Keide bir án óner iesine ataq pen tabys ákelse, endi birde áriptesterdiń arasyn ashyp, úlken daýǵa sebep bolady. Qazaq estradasynda da hit ánniń avtorlyǵyna, ony oryndaý quqyǵyna jáne tólengen qalamaqyǵa bailanysty kelispeýshilikter az emes. Biri satyp alǵan ánin ózgelerdiń oryndaǵanyna renjise, endi biri óz týyndysy úshin sotqa júgingen. Ult.kz tilshisi óner adamdarynyń suhbattaryna súienip, kezinde kópshilik talqysyna túsken bes oqiǵany jinaqtady.
1. Gúlnur Orazymbetova: 1000 dollarǵa satyp alǵan áni basqa oryndaýshyǵa berilgen
Tanymal ánshi Gúlnur Orazymbetova kezinde aqsha tólep satyp alǵan ániniń basqa oryndaýshyǵa berilgenin bilgende renishin jasyrmaǵan.
Óner iesi bul oqiǵany "El aýzynda" baǵdarlamasynda aityp bergen. Áńgime kompozitor Dáýren Serdalievtiń "Júregimdi tyńdashy" ánine qatysty bolǵan. Ánshiniń sózinshe, birneshe jyl buryn oǵan atalǵan shyǵarmany Baǵlan esimdi azamat usynǵan. Gúlnur ándi 1000 dollarǵa satyp alǵanymen, ony úlken sahnaǵa emes, toilarda oryndaýǵa niettengen.
Alaida keiin áleýmettik jeliden Áliia Ábikenniń dál osy ándi stýdiiada jazyp jatqanyn baiqaidy. Osydan soń ánshi kompozitorǵa habarlasyp, týyndynyń ne sebepti basqa adamǵa berilgenin suraǵan. Dáýren Serdaliev ánniń teledidarda oryndalmaǵanyn alǵa tartqan, al Gúlnur Orazymbetova oǵan tólegen aqshasyn qaitarýdy talap etken. Áliia Ábiken bolsa, týyndynyń buryn basqa ánshige berilgeninen habarsyz ekenin jetkizgen. Keiin taraptar aqshany qaitarý jóninde kelisimge kelgenimen, bul jaǵdai án satyp alý men ony oryndaý quqyǵyna qatysty máseleni kópshilik talqysyna shyǵardy.
2. Baqyt Shadaeva: Seifýllin Jolbaryspen aradaǵy renishtiń sebebin aitty
Qazaq estradasynyń belgili ókili Baqyt Shadaeva men ánshi-kompozitor Seifýllin Jolbarystyń arasyndaǵy kelispeýshilik te kezinde aqparat quraldarynda keńinen talqylandy.
Óner iesi 2023 jyly "Juldyzdy shańyraq" baǵdarlamasynda áriptesine ne úshin renjigenin ashyq aitty. Onyń sózinshe, Seifýllin Jolbarys ózine arnap jazǵan ánderin ruqsatynsyz ózge oryndaýshylarǵa bergen. Baqyt Shadaeva bul jaǵdaidyń kóńiline qatty tigenin jetkizip, áriptesiniń áreketin kútpegenin jasyrmaǵan. Ánshi kompozitordyń talantyna qurmetpen qaraitynyn, alaida bolǵan jaǵdaiǵa bailanysty renishiniń bar ekenin aitqan.
Keiin Seifýllin Jolbarys Nege.kz basylymyna bergen suhbatynda bul aiyptaýlarǵa óz jaýabyn berdi. Kompozitordyń túsindirýinshe, Shadaeva ánderdi oryndaý úshin aqy tólegenimen, shyǵarmalardyń avtorlyq quqyǵyn satyp almaǵan. Ol týyndylardyń avtorlyq quqyq uiymynda óz atyna tirkelgenin jáne uzaq jyldar oryndalmaǵan ánderin jastarǵa bergenin málimdegen. Sonymen qatar kompozitor ekeýiniń arasynda buryn jyljymaityn múlikke qatysty kelisim bolǵanyn, onyń esesine ánder jazyp, mýzykalyq óńdeý jumystaryn jasaǵanyn baiandaǵan. Osylaisha, eki óner iesiniń arasyndaǵy kelispeýshilik shyǵarmashylyq qarym-qatynastan bólek, ánniń avtorlyq jáne oryndaýshylyq quqyqtaryna qatysty daýǵa ulasqan.
3. Aiqyn Tólepbergen: "Otyzdan asyp baramyn" áni úshin sot daýy
Tanymal ánshi Aiqyn Tólepbergen oryndaǵan "Otyzdan asyp baramyn" áni de kezinde avtorlyq quqyqqa qatysty daýǵa sebep boldy.
Ózin osy ánniń sazgeri dep tanystyrǵan Sadyq Qynat 2024 jyly NUR.KZ tilshisine týyndynyń shyǵý tarihyn baiandaǵan. Onyń aitýynsha, ánniń áýeni 1993 jyly Shymkentten aýylyna kólikpen qaityp kele jatqan jolda oiyna kelgen. Keiin kompozitor Muqaǵali Maqataevtyń "Otyzdan asyp baramyn" óleńin taýyp, ózi shyǵarǵan áýenge sáikestendirgenin aitqan. Sadyq Qynat shyǵarmanyń halyq arasynda keń taralǵanyna qaramastan, avtor retinde odan tabys tappaǵanyn málimdegen. Ol Aiqyn Tólepbergenniń ándi óz ruqsatynsyz oryndap júrgenin alǵa tartyp, sotqa qaita júginetinin jetkizgen.
Alaida Aiqyn bul aiyptaýmen kelispei, avtorlyq quqyq jónindegi uiymnyń derekterinde basqa kompozitordyń esimi kórsetilgenin túsindirgen. Ánshiniń aitýynsha, Sadyq Qynat buǵan deiin de osy máselemen sotqa júginip, biraq is onyń paidasyna sheshilmegen. Sondai-aq Aiqyn kompozitordyń ózinen 10 million teńge talap etkenin aityp, ánniń avtorlyǵy aldymen tiisti tártippen dáleldenýi qajet ekenin málimdegen.
Osy oqiǵada eki tarap ta óz ustanymynan qaitpaǵanymen, jariialanǵan suhbat olardyń arasyndaǵy daýdyń sol kezdegi jai-kúiin ǵana kórsetedi, keiingi túpkilikti sheshimdi bildirmeidi.
4. Indira Elemes: Qairat Nurtastyń áreketine renjigenin jasyrmady
Ánshi Indira Elemes te bir shyǵarmanyń tóńireginde týyndaǵan jaǵdaidan keiin áriptesi Qairat Nurtasqa renjigenin aitqan. Ol bul týraly "Qyzyqty Weekend" baǵdarlamasynda áńgimelep bergen.
Óner iesi túrkiialyq ánshi Mustafa Sandaldyń "Bekerge qyryldym" ánin qazaq tilinde oryndaýdy josparlaǵan. Sol maqsatpen arnaiy Ystanbulǵa baryp, ándi oryndaýǵa ruqsat alý úshin Mustafa Sandalmen kezdeskenin jetkizgen. Indiranyń aitýynsha, taraptar kelisimge kelip, qajetti qujattarǵa qol qoiǵan.
Alaida Qazaqstanǵa oralǵan soń Qairat Nurtas pen Mádina Sádýaqasovanyń atalǵan ándi oryndaǵanyn bilgen. Ánshi Qairattyń óziniń osy shyǵarmany jazýdy josparlap júrgeninen habardar bolǵanyn aityp, munyń kóńiline aýyr tigenin jasyrmaǵan. Suhbat barysynda ol osy jaǵdaidan keiin kúizeliske túskenin de málimdegen. Degenmen Indira Elemes bastapqy josparynan birjola bas tartpai, keiin Mustafa Sandalmen birge ándi qazaq jáne túrik tilderinde jazyp shyqqan.
Osylaisha, bir týyndyǵa qatysty shyǵarmashylyq josparlardyń sáikes kelýi áriptester arasyndaǵy renishke sebep bolǵanymen, ánshi óz jobasyn júzege asyrýdyń basqa jolyn tapqan.
5. Gaýhar Álimbekova: «Aq kelin» ánin Qairat Nurtas nege ruqsatsyz oryndady?
Ánshi ári kompozitor Gaýhar Álimbekova da óziniń tanymal shyǵarmasyn basqa oryndaýshynyń aldyn ala kelisimsiz aitqanyna qatysty pikir bildirgen. Áńgime halyq arasynda keń taraǵan "Aq kelin" áni týraly bolǵan.
Óner iesi 2024 jyly "HabarLike" baǵdarlamasynda atalǵan týyndyny Qairat Nurtastyń ózinen ruqsat suramai oryndaǵanyn málimdegen. Ánshiniń sózinshe, bul jaǵdai onyń kóńiline tigen. Keiin Qairattyń anasy ári prodiýseri Gúlzira Aidarbekova habarlasyp, ánniń kaver shoý aiasynda oryndalǵanyn túsindirgen.
Gaýhar Álimbekova shyǵarmany oryndamas buryn avtordan ruqsat suraýdyń mańyzyn atap ótken. Onyń aitýynsha, eger Qairat Nurtas aldyn ala habarlasqanda, ándi oryndaýyna qarsy bolmas edi. Osylaisha, kompozitordyń renishi ánniń basqa daýyspen shyrqalýynan góri, ózimen kelisilmegenine bailanysty bolǵan.
Bul oqiǵa tanymal shyǵarmalardy qaita oryndaý kezinde avtor men oryndaýshy arasyndaǵy ózara syilastyqtyń qanshalyqty mańyzdy ekenin kórsetti. Al Qairat Nurtastyń osy jaǵdaiǵa qatysty derbes túsiniktemesi atalǵan suhbatta keltirilmegendikten, Gaýhar Álimbekovanyń aitqandary onyń jeke ustanymy retinde qarastyrylýy tiis.
Qazaq estradasyndaǵy bul bes oqiǵa bir ánniń birneshe óner iesiniń arasyndaǵy kelispeýshilikke qalai sebep bolatynyn kórsetedi. Bir jaǵdaida másele ánge tólengen qarajatqa bailanysty týyndasa, ekinshisinde avtorlyq quqyq pen týyndyny paidalaný tártibi talqyǵa túsken. Al keibir óner adamdary úshin daýdyń basty sebebi aqsha emes, shyǵarmashylyq eńbegine degen qurmettiń jetispeýi bolǵan.
Degenmen ánge qatysty renishtiń bárin avtorlyq quqyqtyń buzylýy nemese sotpen dáleldengen zańsyz áreket dep baǵalaýǵa bolmaidy. Ár oqiǵanyń ózindik mán-jaiy bar, al óner ieleriniń suhbatta aitqan pikirleri olardyń sol kezdegi ustanymyn bildiredi. Bul jaǵdailar tanymal hittiń artynda tyńdarman bile bermeitin kelissózder, shyǵarmashylyq eńbek jáne keide sheshimi kúrdeli daýlar jatatynyn ańǵartady.
