Memleket basshysy tramvaimen Respýblika dańǵylynan «Injener» aialdamasyna deiin júrip ótip, atqarylǵan istiń sapasyn jáne jańartylǵan kólik infraqurylymynyń paidalanýǵa tolyǵymen ázir ekenin kórdi, dep habarlaidy ult.kz.
Qarmet kompaniiasy tramvaidy qala halqynyń igiligine eki jyl buryn bergen bolatyn. Sodan beri atalǵan qoǵamdyq kólik qatynasy 1 millionnan asa jolaýshyny tasymaldaǵan.
Qalada tramvaiǵa arnalǵan 30 shaqyrym shoiyn jol qalpyna keltirilip, aýystyryldy, jańadan zamanaýi 8 vagon satyp alyndy. Bul tramvaidyń kestege sáikes turaqty júrýine múmkindik berdi.
Relsti kólikte jolaýshylarǵa yńǵaily bolýy úshin elektrondy tólem júiesi ornatylǵan, al Qarmet kásipornynyń jumyskerleri men ardagerleri tegin júredi.
Prezident «Qarmet» AQ basshylyǵymen áńgimelesý barysynda metallýrgter qalasyndaǵy tramvai qatynasyn qalpyna keltirýdiń mańyzyn atap ótti.
– Shyn máninde, Temirtaý úshin tramvai – zamanalardy bailanystyratyn dáneker ispettes. Turǵyndardyń tramvai qatynasyn qalpyna keltirý týraly talabyn oryndaǵanyńyz durys bolypty. Kombinatqa alǵash kelgenińizde Temirtaý qalasyn abattandyrýmen mindetti túrde ainalysý qajet dep aitqan edim. Óitkeni qala kútim kórmei, tozyp ketti. Áli de atqarylatyn jumys kóp, degenmen bastamasy jaqsy. Temirtaý turǵyndary tabiǵi gazben qamtamasyz etildi. Baiqaýymsha, halyqtyń kóńil-kúii kóterińki. Óitkeni adamdar ainaladaǵy oń ózgeristerdi baiqap, alǵystaryn bildirýde. Eńbek ujymynyń da kóńil-kúii aitarlyqtai jaqsarǵany baiqalady. Eń bastysy, jaǵymdy úderis bar. Biz kombinatty mindetti túrde progress pen tabystyń simvolyna ainaldyramyz, tipti ony órkendetemiz, – dedi Qasym-Jomart Toqaev.
