Qyzylordada sheteldik investordyń kásipkerlik qyzmetine zańsyz aralasqan sanitariialyq-epidemiologiialyq baqylaý basqarmasynyń basshysy men bas mamany ákimshilik jaýapkershilikke tartyldy. Árqaisysyna 432 500 teńge kóleminde aiyppul salyndy, dep habarlaidy ult.kz.
Qyzylorda qalasynyń prokýratýrasy «TEMA RETAILKZ» JShS-niń quqyqtaryn qorǵaý barysynda sanitariialyq-epidemiologiialyq baqylaý basqarmasynyń zańsyz áreketin anyqtady.
Tekserý nátijesinde basqarma investorǵa qatysty jedel den qoiý sharasyn prokýratýramen aldyn ala kelispei qoldanǵany belgili boldy. Tiisti sheshim prokýratýraǵa ony qabyldaǵannan keiin ǵana joldanǵan.
Prokýratýra atalǵan sheshimniń negizsiz ekenin anyqtap, ony kelisýden bas tartqan. Zań buzýshylyqty joiý maqsatynda Qyzylorda oblysynyń sanitariialyq-epidemiologiialyq baqylaý departamentine prokýrorlyq qadaǵalaý aktisi engizildi.
Nátijesinde investorǵa qatysty zańsyz qoldanylǵan sharanyń kúshi joiyldy.
Sonymen qatar kásipkerlik qyzmetke zańsyz aralasqany úshin qalalyq basqarmanyń basshysy men bas mamany Ákimshilik quqyq buzýshylyq týraly kodekstiń 173-babynyń 1-bóligi boiynsha jaýapqa tartyldy. Olardyń árqaisysyna 432 500 teńge aiyppul salyndy.
Aita keteiik, buǵan deiin sheteldik investordyń bank shottary zańsyz buǵattalǵany anyqtalǵan bolatyn.
