قىزىلوردادا شەتەلدٸك ينۆەستوردىڭ كەسٸپكەرلٸك قىزمەتٸنە زاڭسىز ارالاسقان سانيتارييالىق-ەپيدەميولوگييالىق باقىلاۋ باسقارماسىنىڭ باسشىسى مەن باس مامانى ەكٸمشٸلٸك جاۋاپكەرشٸلٸككە تارتىلدى. ەرقايسىسىنا 432 500 تەڭگە كٶلەمٸندە ايىپپۇل سالىندى, دەپ حابارلايدى ult.kz.
قىزىلوردا قالاسىنىڭ پروكۋراتۋراسى «TEMA RETAILKZ» جشس-نٸڭ قۇقىقتارىن قورعاۋ بارىسىندا سانيتارييالىق-ەپيدەميولوگييالىق باقىلاۋ باسقارماسىنىڭ زاڭسىز ەرەكەتٸن انىقتادى.
تەكسەرۋ نەتيجەسٸندە باسقارما ينۆەستورعا قاتىستى جەدەل دەن قويۋ شاراسىن پروكۋراتۋرامەن الدىن الا كەلٸسپەي قولدانعانى بەلگٸلٸ بولدى. تيٸستٸ شەشٸم پروكۋراتۋراعا ونى قابىلداعاننان كەيٸن عانا جولدانعان.
پروكۋراتۋرا اتالعان شەشٸمنٸڭ نەگٸزسٸز ەكەنٸن انىقتاپ, ونى كەلٸسۋدەن باس تارتقان. زاڭ بۇزۋشىلىقتى جويۋ ماقساتىندا قىزىلوردا وبلىسىنىڭ سانيتارييالىق-ەپيدەميولوگييالىق باقىلاۋ دەپارتامەنتٸنە پروكۋرورلىق قاداعالاۋ اكتٸسٸ ەنگٸزٸلدٸ.
نەتيجەسٸندە ينۆەستورعا قاتىستى زاڭسىز قولدانىلعان شارانىڭ كٷشٸ جويىلدى.
سونىمەن قاتار كەسٸپكەرلٸك قىزمەتكە زاڭسىز ارالاسقانى ٷشٸن قالالىق باسقارمانىڭ باسشىسى مەن باس مامانى ەكٸمشٸلٸك قۇقىق بۇزۋشىلىق تۋرالى كودەكستٸڭ 173-بابىنىڭ 1-بٶلٸگٸ بويىنشا جاۋاپقا تارتىلدى. ولاردىڭ ەرقايسىسىنا 432 500 تەڭگە ايىپپۇل سالىندى.
ايتا كەتەيٸك, بۇعان دەيٸن شەتەلدٸك ينۆەستوردىڭ بانك شوتتارى زاڭسىز بۇعاتتالعانى انىقتالعان بولاتىن.
