Aqtóbede esirtki satatyn internet-dúkenniń qarjylyq operatsiialaryn júrgizgen qylmystyq toptyń áreketi áshkerelendi. Kúdiktiler zańsyz saýdadan túsken aqshany 22 bank kartasy arqyly qabyldap, kriptovaliýtaǵa aiyrbastap otyrǵan. Jalpy aýdarylǵan qarjy kólemi 400 mln teńgeden asqan, dep habarlaidy ult.kz.
Qarjylyq monitoring agenttiginiń Aqtóbe oblysy boiynsha departamenti júrgizgen tergeý barysynda qylmystyq toptyń jumys júiesi anyqtaldy.
Tergeý málimetinshe, Aqtóbe qalasynyń turǵyny áleýmettik jelide aqsha aiyrbastaý tobyn quryp, oǵan jeti adamdy tartqan. Top músheleri mindetterin bólisip, kúndizgi jáne túngi aýysymmen jumys istegen. Osylaisha esirtki internet-dúkeniniń qarjylyq operatsiialaryn táýlik boiy qamtamasyz etip otyrǵan.
Internet-dúkennen esirtki satyp alýǵa tapsyrys bergen adamdar aldymen tólem jasaý úshin osy topqa baǵyttalǵan. Aqsha aýdarylǵany rastalǵan soń, satyp alýshylarǵa esirtki jasyrylǵan oryndardyń koordinattary jiberilgen.
Qarjylyq operatsiialardyń aýqymy da az bolmaǵan. Top músheleri kún saiyn 50-70 tólem qabyldap, aqshany ózge adamdardyń atyna ashylǵan 22 bank kartasy arqyly ótkizgen. Keiin qarajat kriptovaliýtaǵa aiyrbastalyp, esirtki saýdasyn uiymdastyrýshylar baqylaýyndaǵy kriptoámiiandarǵa aýdarylyp otyrǵan.
Tergeý deregine sáikes, osyndai jolmen aýdarylǵan qarajattyń jalpy kólemi 918 myń USDT-den asqan. Bul 400 mln teńgeden astam somaǵa teń.
Qylmystyq shemany uiymdastyrdy degen kúdikti qamaýǵa alyndy. Qazirgi ýaqytta tergeý amaldary jalǵasyp jatyr.
Qylmystyq-protsestik kodekstiń 201-babyna sáikes, tergeýdiń ózge málimetteri jariia etilmeidi.
