Ispaniia úkimeti Ýrda qalasy mańynda bolǵan temirjol apatynan zardap shekkender men qaza tapqandardyń týystaryna qarjylai kómek kórsetýdi josparlap otyr. Qazir apattan kóz jumǵan 69 adamnyń 56-synyń jeke basy anyqtaldy, dep habarlaidy ult.kz.
Jergilikti BAQ málimetinshe, 3 qarashada Ispaniia úkimeti apattan zardap shekkenderge ótemaqy tóleý týraly koroldik dekretti bekitýdi kózdep otyr.
Kólik ministri Oskar Pýente sol kúni apattyń mán-jaiy týraly baiandama jasap, baspasóz máslihatynda josparlanǵan sharalardy túsindiredi. Sondai-aq ol óz bastamasymen Kongress komissiiasynyń otyrysynda sóz sóilep, depýtattarǵa aqparat beredi.
Úkimet ótemaqy mólsherin belgileý kezinde biyl 18 qańtarda Adamýs qalasynda bolǵan poiyz apatynan keiingi tájiribeni negizge almaq. Ol kezde qaza tapqan ár adam úshin jalpy somasy 216 myń eýro ótemaqy belgilengen. Onyń 72 myń eýrosy tikelei tólem retinde, qalǵan bóligi saqtandyrý ótemaqysy esebinen berilgen.
Al jaraqat alǵandarǵa alǵan jaraqatynyń aýyrlyǵyna qarai 2 400 eýrodan 84 myń eýrodan astam qarjy tólengen. Tólemder bir rettik negizde berilip, salyqtan bosatylǵan. Alaida Ýrdadaǵy apattan zardap shekkenderge tólenetin naqty ótemaqy mólsheri ázirge jariialanǵan joq.
Aýrýhanalarda 40-tan astam adam jatyr
Madrid avtonomiialyq qaýymdastyǵynyń aýrýhanalarynda apattan zardap shekken 10 adam em qabyldap jatyr. Olardyń úsheýi jansaqtaý bóliminde. Apattan beri Madrid meditsina qyzmetkerleri 122 adamǵa kómek kórsetken.
Kastiliia-La-Mancha aimaǵyndaǵy aýrýhanalarda taǵy 31 adam jatyr. Olardyń 13-i jansaqtaý bóliminde. Alǵashynda aýrýhanaǵa túsken 110 adamnyń 79-y emdelip, úilerine shyǵarylǵan.
Qazir apat bolǵan jerde biologiialyq qaldyqtardy izdeý jumystary jalǵasyp jatyr. Azamattyq gvardiia aýmaqty drondar, atty patrýlder jáne baqylaý beketteri arqyly kúzetýdi kúsheitken. Madrid – Sevilia joǵary jyldamdyqty temirjol jelisiniń eki baǵyttaǵy eki shaqyrymdyq bóligi qorshaýǵa alynǵan. Ol jerge tek qaýipsizdik qyzmetkerleri men sottyń arnaiy ruqsaty bar mamandar ǵana kire alady.
Eske salaiyq, qaiǵyly oqiǵa 28 qazanda jergilikti ýaqyt boiynsha saǵat 08:54 shamasynda Madridten ońtústikke qarai 130 shaqyrym jerde bolǵan. Apatqa Renfe kompaniiasynyń AVE poiyzy men jeke Iryo operatorynyń quramy qatysqan. Eki poiyz da Madrid – Sevilia baǵytymen júrgen.
Aldyn ala málimet boiynsha, Renfe poiyzy aldynda toqtap turǵan nemese jyldamdyǵyn tómendetken Iryo quramyna art jaǵynan soǵylǵan. Apat saldarynan 69 adam qaza taýyp, 110 adam jaraqat alǵan.
29 qazanda Ispaniiada qaza tapqandardy eske alýǵa bailanysty úsh kúndik aza tutý jariialandy.
Bul – 1970 jyldardan beri Ispaniiada bolǵan eń iri úsh temirjol apatynyń biri. Sondai-aq 2026 jylǵy eldegi ekinshi iri temirjol apaty sanalady. Qańtarda Adamýs mańynda poiyzdardyń soqtyǵysýynan 46 adam qaza tapqan edi.
Qazirgi ýaqytta tergeý jalǵasyp jatyr. Tergeýshiler poiyzdardyń soqtyǵysýyna avtomatty qaýipsizdik júiesi LZB-degi aqaý sebep bolýy múmkin degen nusqany da qarastyryp jatyr.
