Belgili aitysker aqyn, qoǵam qairatkeri Rinat Zaiyt áriptesi Maqsat Ahanovtyń ainalasynda týyndaǵan daýǵa qatysty pikir bildirdi. Ol aqyndy aitystan shettetý týraly áńgimeni orynsyz dep sanaitynyn aityp, onyń ónerdegi ornyn erekshe atap ótti, dep habarlaidy ult.kz.
Rinat Zaiyt bul týraly Adal ADAM YouTube arnasyna bergen suhbatynda aitty. Áńgime barysynda ol aitys óneriniń qazirgi jaǵdaiyna toqtalyp, Maqsat Ahanovqa qatysty daýǵa óz kózqarasyn bildirdi.
Aqynnyń aitýynsha, aityskerdi ónerden shettetý úshin onyń áreketinde eleýli zańbuzýshylyq bolýy kerek. Al Maqsat Ahanovtyń sózinen mundai jaǵdaidy baiqamaǵanyn jetkizdi.
"Qazir aitysker aqyndy memlekettiń ar-namysyna tietin, ultarazdyqty týdyratyn nárse aitsa, shettetýge bolady. Maqsat Ahanov ne istedi? Ol bir adamǵa tietin sóz aitqan joq. "Adaidyń shaldary" degendi kúndelikti qoldanysta Mańǵystaýdyń jigitteri de maqtanyshpen aitady", – dedi Rinat Zaiyt.
Ol Maqsat Ahanovtyń aitystaǵy sózderin kórgende kerisinshe qyzyǵýshylyq tanytqanyn jasyrmady. Tipti sol sátte óziniń jastyq shaǵyn eske alyp, ázilmen jaýap bergen.
"Men sol videony kórgende qaita qyzyqtym. Osylai erkelep júre berý kerek edi, shirkin", – dep aqyn kúlip aldy.
Rinat Zaiyttyń pikirinshe, Maqsat Ahanovty aitystan shettetý týraly áńgimeniń ózi orynsyz. Ol mundai jaǵdaida shyǵarmashylyq uiymdar aqyndy jazalaýdyń emes, qorǵaýdyń jolyn qarastyrýy kerek dep esepteidi.
"Maqsat Ahanovty bireý shettetedi, úitedi-búitedi degen bos sóz. Ol áńgimeni bizdiń odaq tipten shyǵarmai-aq ta qoiýy kerek edi. Kerisinshe, olar Maqsatty qorǵap qalýlary kerek edi. Biraq Qudaiǵa shúkir, Maqsattyń halqy, áriptesteri bar. Maqsatty eshkim shettete almaidy", – dedi ol.
Sonymen qatar Rinat Zaiyt áriptesiniń aitys ónerine qosqan úlesin joǵary baǵalady. Onyń sózinshe, Maqsat Ahanov – kórermenniń aitysqa degen qyzyǵýshylyǵyn saqtap júrgen talanttardyń biri.
"Maqsat Ahanovty shettetý degen qaida ol? "Maqsat aitystyń aýditoriiasynyń eshqaida ketip qalmaýyna tikelei áser etip júrgen erekshe daryn iesi", – dep túiindedi aqyn.
Osylaisha, Rinat Zaiyt áriptesine qoldaý bildirip, aityskerlerdiń shyǵarmashylyq erkindigi men ónerdegi bedelin qorǵaý mańyzdy ekenin jetkizdi.
Rinat Zaiytov kim?
Rinat Rifhatuly Zaiytov – belgili aitysker aqyn, qoǵam qairatkeri jáne Qazaqstan Respýblikasy Parlamenti Májilisiniń burynǵy depýtaty. Ol 1984 jyly 14 qarashada qazirgi Abai oblysy Aiagóz aýdanyna qarasty Órken aýylynda dúniege kelgen.
Semei qalasyndaǵy Muqan Tólebaev atyndaǵy kolledjde drama akteri mamandyǵy boiynsha bilim alǵan. Keiin Semei pedagogikalyq institýtynda qazaq tili men ádebieti pániniń muǵalimi mamandyǵyn meńgergen. Sondai-aq Qazaq qatynas joldary ýniversitetinde "Biznes jáne basqarý" baǵyty boiynsha magistr dárejesin alǵan.
Eńbek jolyn 2001 jyly Semeidegi "Dariǵa-ai" jastar teatrynda akter bolyp bastaǵan. 2008–2010 jyldary atalǵan teatrdyń kórkemdik jetekshisi qyzmetin atqarǵan.
2021–2023 jyldary Almatydaǵy «Alataý» dástúrli óner teatrynyń direktory bolǵan.
2023–2026 jyldary VIII shaqyrylymdaǵy Májilis depýtaty bolyp, Áleýmettik-mádeni damý komitetiniń quramynda jumys istegen.
2026 jyldyń qazan aiynda Qazaqstan Qarýly kúshteri Ulttyq áskeri-patriottyq ortalyǵynyń basshysy qyzmetine taǵaiyndalǵan.
