Tanymal ánshi Merýert Túsipbaeva memlekettik marapatqa usynylyp, keiin úmitkerler qatarynan shyǵarylǵanyn aityp, kópshilikti tańǵaldyrdy. Óner iesi bul jaǵdaiǵa qatysty áleýmettik jelide pikir bildirdi, dep habarlaidy ult.kz.
Ánshi sońǵy ýaqytta óner adamdaryna berilip jatqan memlekettik ataqtar men marapattarǵa qatysty oqyrmandarynan kóp suraq túskenin jetkizdi. Osyǵan bailanysty ol óziniń de marapatqa usynylyp, alaida tizimnen alynyp tastalǵanyn jasyrmady.
Merýert Túsipbaevanyń aitýynsha, 55 jasqa tolýyna orai ony memlekettik ordenge usynǵan. Alaida belgisiz bireý onyń kandidatýrasyn laiyqsyz dep taýyp, úmitkerler qatarynan shyǵaryp tastaǵan. Ánshi mundai sheshimdi kim qabyldaǵanyn naqtylamady.
Óner iesi buǵan deiin alǵan ataǵyn da eske aldy. Onyń sózinshe, 2014 jyly berilgen "Qazaqstannyń eńbek sińirgen qairatkeri" ataǵy sol kezeńde óner adamdary úshin asa mańyzdy marapattardyń biri bolǵan.
"Jaqynda jańbyrdai jaýǵan ataqtar týraly maǵan kóp suraq keldi. "Qazanshynyń erki bar" – meniń jaýabym. "Eńbek sińirgen qairatker" ataǵy sol kezeńde "Halyq ártisi" ataǵyna jaqyn edi. Óitkeni ol kezde "Halyq ártisi" ataǵyn múldem alyp tastaǵan bolatyn. Maǵan bul ataq 2014 jyly buiyrdy. Shúkir! Jaqynda 55 jas mereitoiyma orai ordenge usynylyp edim. "Laiyqsyz" dep meni bir myqty syzyp tastapty. Eshteńe etpeidi, iá? Búgin men osy videomen meni syzyp tastaǵan adamǵa jaýap berdim!" – dedi ánshi.
Soǵan qaramastan Merýert Túsipbaeva bul jaǵdaiǵa bola qatty qapalanbaǵanyn ańǵartty. Ol ózin marapattan shettetken adamǵa arnaiy video arqyly jaýap bergenin málimdedi.
Ánshiniń bul málimdemesinen keiin onyń kandidatýrasyn kim jáne qandai sebeppen tizimnen alyp tastaǵany belgisiz kúiinde qalyp otyr. Óner iesi de bul sheshimniń naqty mán-jaiyn ashyp aitpady.
Merýert Túsipbaeva kim?
Merýert Balǵabaiqyzy Túsipbaeva – qazaqstandyq estrada ánshisi, teatr jáne kino aktrisasy, Qazaqstannyń eńbek sińirgen qairatkeri.
Ol 1971 jyly 6 tamyzda Pavlodar oblysynyń Baianaýyl aýdanynda dúniege kelgen. 1995 jyly Temirbek Júrgenov atyndaǵy Qazaq ulttyq óner akademiiasyn "Mýzykalyq teatr akteri" mamandyǵy boiynsha támamdaǵan. Oqý ornynda Qazaqstannyń halyq ártisi, professor Tilektes Meiramovtan dáris alǵan.
Eńbek jolyn Ǵabit Músirepov atyndaǵy Qazaq memlekettik akademiialyq balalar men jasóspirimder teatrynda bastaǵan. Keiin estradaǵa bet buryp, 1996 jyly jaryq kórgen "Qimai seni baramyn" áni arqyly kópshilikke tanyldy. Bul ánniń áýenin kompozitor Tólegen Muhamedjanov, sózin aqyn Shómishbai Sariev jazǵan.
Atalǵan týyndyǵa túsirilgen beinebaian 1996 jyly "Altyn juldyz" baiqaýynda úzdik úsh beinebaiannyń qataryna engen.
Ánshilikpen qatar kino salasynda eńbek etip, óner akademiiasynda stýdentterge sabaq bergen.
2014 jyly "Qazaqstannyń eńbek sińirgen qairatkeri" qurmetti ataǵyn alǵan.
