Burynǵy depýtat, Ulttyq áskeri-patriottyq ortalyqtyń basshysy Rinat Zaiyt aitysker Maqsat Ahanovqa qatysty daýǵa pikir bildirdi. Ol Adal ADAM YouTube arnasyna bergen suhbatynda aqyndy aitystan shettetýge negiz kórmeitinin aitty, dep habarlaidy ult.kz.

Rinat Zaiyttyń pikirinshe, aityskerdiń sózi ultaralyq arazdyqty qozdyrsa nemese memleketke til tigizse, ony sahnadan shettetý máselesin qarastyrýǵa bolady. Alaida ol Maqsat Ahanovtyń sózinen mundai mazmun baiqamaǵanyn jetkizdi.

«Maqsat kimge ne dedi? Aitysta ultarazdyqty qozdyratyn, memleketke til tigizetin sóz aitsa, shettetýge bolatyn shyǵar. Maqsat bir adamǵa tietin sóz aitpady. “Adaidyń shaldary” degen - kúndelikti qoldanystaǵy sóz», – dedi ol.

Suhbat barysynda Rinat Zaiyt jelide taraǵan videoǵa da toqtaldy.

«Maqsat Ahanovtyń bar istegeni sahnada mas bolyp qalǵany ma? Men, kerisinshe, sol videony kórip qyzyqtym. Osylai erkelep júre berý kerek edi. Odaq Maqsatty qorǵap qalýy kerek edi», – dedi Rinat Zaiyt.

Aita keteiik, Maqsat Ahanov aitystan shettetildi.

Rinat Zaiyt kim?

Rinat Zaiyt – aitysker aqyn, qoǵam qairatkeri, Májilistiń burynǵy depýtaty. Kópshilikke aitystarda áleýmettik máselelerdi kóterip, ótkir pikir aitýymen tanylǵan. Ol 2023–2026 jyldary Parlament Májilisiniń VIII shaqyrylym depýtaty bolyp, Áleýmettik-mádeni damý komitetiniń quramynda jumys istegen.

Qazir Qazaqstan Qarýly kúshteriniń Ulttyq áskeri-patriottyq ortalyǵyn basqarady.

Óziniń aitýynsha, bul qyzmetke 2026 jylǵy qazannyń basynda kelgen. Ortalyq áskeri ansambl men orkestrdiń jumysyn úilestirip, patriottyq jáne mádeni is-sharalar uiymdastyrady.