Tanymal ázilkesh Tursynbek Qabatov jylytý maýsymyna bailanysty turǵyndardy saq bolýǵa shaqyrdy. Óner iesi peshpen jylytylatyn úilerge ýly gazdy anyqtaityn datchik ornatýǵa keńes berdi, dep habarlaidy ult.kz.

Pavlodar qalasynda júrgen ázilkesh kún sýyǵan saiyn kómir jaǵatyn jeke úilerde qaýipsizdikke erekshe mán berý qajettigin aitty. Ol ýly gazdan tutas otbasylar zardap shekken jaǵdailardy eske salyp, turǵyndardy qaýiptiń aldyn alýǵa úndedi.

«Men qazir Pavlodar qalasyndamyn. Qys bastalyp jatyr. Gaz áli kelmegen, kómir jaǵyp otyrǵan kóp jer úi bar. Ýly tútinniń kesirinen ómirden ótip ketken otbasylar da kezdesedi. Qaýiptiń aldyn alý úshin abai bolyńyzdar. Ýly tútinnen, bále-jaladan saqtasyn sizderdi. Mynadai apparat shyqqan eken. Úilerińizge qoiyp qoisańyzdar bolady», – dedi Tursynbek Qabatov.

Óner iesi kórsetken qurylǵy aýadaǵy ýly gazdy anyqtap, qaýip tóngende dybystyq belgi beredi. Ázilkeshtiń aitýynsha, mundai eskertý úidegilerdiń, sonyń ishinde uiyqtap jatqan adamdardyń da qaýipti der kezinde baiqaýyna kómektesedi.

Aita keteiik, Móldir Muqannyń Tursynbek Qabatovqa arnaǵan burynǵy jazbasy tarady. 

Tursynbek Qabatov kim?

Tursynbek Qabatov -  qazaqstandyq ázilkesh, akter jáne telejúrgizýshi. Ol 1975 jyly 10 qarashada Batys Qazaqstan oblysynda dúniege kelgen. Kópshilikke KVN oiyndary men ázil-syqaq baǵdarlamalary arqyly tanyldy.

Óner iesi sahnada kúndelikti turmystaǵy oqiǵalardy, otbasylyq qarym-qatynasty jáne qoǵamdaǵy túrli qubylystardy ázilge arqaý etedi.

Qarapaiym tilmen áńgimelep, keiipkerlerdiń minezin somdaýy - onyń ónerine tán erekshelik. Tursynbek Qabatov «Ázil álemi» jobasy arqyly da kórermenge keńinen tanylǵan. Sondai-aq «Óner barysy» ázil saiysynyń júrgizýshisi retinde belgili. Ol elimizdiń túrli óńirinde jeke shyǵarmashylyq keshterin ótkizip keledi.