Almatynyń ortalyǵyndaǵy bes qabatty úi turǵyndary birneshe jyldan beri kórshisiniń áreketine shaǵymdanyp keledi. Olardyń aitýynsha, zeinetker páterine tamaq qaldyqtaryn, bótelkeler men eski zattardy jinap, úiin qoqysqa toltyrǵan. Endi turǵyndar sotqa júginbek, dep habarlaidy ult.kz.
KTK telearnasynyń málimetinshe, kórshilerdiń sózinshe, bir bólmeli páterde jaryq pen sý joq. Úi ishi las ydystarǵa, shirigen qaldyqtar men eski zattarǵa tolǵan. Turǵyndar áielmen birneshe ret sóilesýge tyrysqanymen, nátije bolmaǵan. Kerisinshe, olardyń esik aldyna óli kógershinder men qoqys tastalǵan.
«Onymen kelisý múmkin emes. Biz sóileskennen keiin kelesi kúni esigimizdiń aldyna óli qustardy nemese qoqys salynǵan qoraptardy tastap ketetin», – deidi kórshisi Tatiana Gerasimenko.
Turǵyndardy páterdiń sanitarlyq jaǵdaiymen qatar, órt qaýipsizdigi de alańdatady. Olardyń aitýynsha, buǵan deiin úide órt bolǵan.
Kórshiler politsiia men ákimdikke birneshe ret shaǵymdanǵan. Alaida qalalyq qyzmet ókilderi páter iesiniń ruqsatynsyz úige kire almaitynyn aitqan.
Zańger Gaýhar Sálimbekova turǵyndarǵa ortaq talap-aryzben sotqa júginýge keńes berdi. Sot arqyly páter iesin jinalǵan qoqysty shyǵarýǵa mindetteýge bolady.
Jýrnalister aralasqannan keiin ákimdik kommýnaldyq qyzmet mamandaryn jiberip, páter terezesiniń astyndaǵy qoqysty tazalatqan. Degenmen kórshiler bul másele qaita qaitalanýy múmkin dep qaýiptenedi.
