Akter Erbolat Álqoja túsirilim kezinde jaraqat alyp, bir qulaǵy estimei qalǵanyn aitty. Qazir óner iesi Qyrǵyzstanda dárigerlerdiń kómegine júginip, em qabyldap jatyr, dep habarlaidy ult.kz.

Akter densaýlyǵyna qatysty jaisyz habardy oqyrmandaryna ózi jetkizgen. Onyń aitýynsha, túsirilim barysynda alǵan jaraqaty oń qulaǵyna zaqym keltirgen.

«Túsirilim kezinde jaraqat aldym. Myna oń jaq qulaǵym múldem estimei qaldy. Qyrǵyzstannyń men-men degen myqty dárigerleri emdep jatyr. Qyrǵyz baýyrlarymyzǵa úlken alǵys», – dedi Erbolat Álqoja.

Óner iesi ózine em júrgizip jatqan qyrǵyzstandyq mamandarǵa rizashylyǵyn bildirdi. Alaida jaraqatty qandai jaǵdaida alǵanyn jáne emniń qansha ýaqytqa sozylatynyn naqtylamady.

Akterdiń jaǵdaiyn estigen oqyrmandary oǵan qoldaý bildirip, em-domyna qarjylai kómektesýge niet tanytqan. Erbolat Álqoja janashyrlyq tanytqan jandarǵa alǵys aityp, aqsha aýdarýdyń qajeti joq ekenin jetkizdi.

Aita keteiik, Bekjan Turystyń uly shańyraq kóterip, dúrkiretip toi ótkizdi. 

Erbolat Álqoja kim?

Erbolat Álqoja  – qazaqstandyq kino jáne teleserial akteri. Ol kórermenge «Sáke», «Aýyldastar», «Ata-ana, bala-shaǵa», «Kanikýly offline» jobalaryndaǵy rólderi arqyly tanys. Óner iesi suhbattarynda akterlik joly men túsirilimdegi tájiribesi týraly bólisken.

Akterdiń eleýli jumystarynyń biri — «Baqyt» filmindegi basty rólderdiń biri. Turmystyq zorlyq-zombylyq taqyrybyn qozǵaityn týyndyda ol jaǵymsyz keiipkerdi somdaǵan.

Erbolattyń aitýynsha, kei kórermen ony osy obrazymen este saqtap qalǵan. Alaida kórermender arasynda keiipkeriniń áreketinen bólek, akterlik sheberligin baǵalap, alǵys aitqandar da bolǵan.