Mańǵystaý oblysynda probatsiia talaptaryn birneshe ret buzǵan azamat bas bostandyǵynan aiyryldy. Ol belgilengen ýaqytta baqylaý qyzmetine kelmei, ruqsatsyz basqa eldimekenge ketip júrgen, dep habarlaidy ult.kz.
Polisia.kz málimetinshe, Beineý aýdandyq soty urlyq jasaǵany úshin azamatty 5 jylǵa bas bostandyǵynan aiyrýǵa úkim shyǵarǵan. Alaida jaza shartty túrde taǵaiyndalyp, ol probatsiia qyzmetiniń baqylaýyna alynǵan.
Baqylaý kezeńinde sottalǵan azamat ózine júktelgen mindetterdi birneshe ret buzǵan. Atap aitqanda, probatsiia qyzmetine ýaqytynda kelmegen, turǵylyqty mekenjaiynda bolmaǵan jáne ruqsatsyz basqa eldimekenge ketken.
Birneshe ret eskertý jasalǵanymen, ol zań talaptaryn oryndamaǵan. Osyǵan bailanysty probatsiia qyzmeti shartty sottaýdyń kúshin joiý týraly sotqa usynys engizgen.
Sot usynysty qanaǵattandyryp, azamatty bas bostandyǵynan aiyrý týraly sheshim qabyldady. Qazir ol ýaqytsha ustaý izoliatoryna qamalǵan.
