Tanymal akter Bekjan Turystyń áýleti kelin túsirip, qýanyshqa keneldi. Óner iesiniń uly Maǵjan otbasyn quryp, jaqyndary men aǵaiyn-týystyń basyn qosqan úlken toi ótti, dep habarlaidy ult.kz.

Qazaqy salt-dástúrge sai uiymdastyrylǵan keshte jas jubailarǵa aq tilekter aitylyp, erekshe úlgide «Jar-jar» shyrqaldy. Jańa ómirge qadam basqan jupqa jinalǵan qaýym baqyt tilep, aq batasyn berdi.

Toida qonaqtarǵa arnalǵan baǵaly syilyqtar da jurt nazaryn aýdardy. Ásirese, ortaǵa qoiylǵan arnaiy sandyqtyń ishinde ne bar ekeni kópshiliktiń qyzyǵýshylyǵyn oiatty.

Kesh tizginin ustaǵan asaba sandyqta sý jańa avtokóliktiń kilti de jasyrylýy múmkin ekenin aityp, qonaqtardy eleń etkizdi. Degenmen kóliktiń naqty utysqa tigilgeni nemese onyń kimge buiyrǵany týraly málimet aitylmady.

Aita keteiik, Móldir Muqan qarjylyq jaǵdaiyn tilge tiek etti. 

Bekjan Turys kim?

Bekjan Asaýbaiuly Turys – qazaqstandyq teatr jáne kino akteri, Qazaqstannyń eńbek sińirgen qairatkeri. Ol 1965 jyly 15 aqpanda Almaty oblysy Uiǵyr aýdanynyń Shoshanai aýylynda dúniege kelgen. 1987 jyly T. Júrgenov atyndaǵy oqý ornyn teatr jáne kino akteri mamandyǵy boiynsha támamdaǵan.

Óner iesi teatr sahnasynda dramalyq jáne komediialyq keiipkerlerdi somdap, ózindik qoltańbasyn qalyptastyrdy. Onyń shyǵarmashylyq qorjynynda «Aiman-Sholpan», «Ómirzaia», «Toidan qaitqan qazaqtar», «Men ishpegen ý bar ma?..» sekildi qoiylymdardaǵy rólder bar.

Kópshilikke «Jetpis jeti kún», «Uiat bolmasyn», «Erkektiń aty erkek» televiziialyq jobalary arqyly keńinen tanyldy. Ásirese, «Uiat bolmasyn» baǵdarlamasyndaǵy Aqylbai shal beinesi kórermenniń esinde qaldy. Sondai-aq akter «Bazarbaevtar» telehikaiasyna túsken.

Bekjan Turys 2004 jyly «Daryn» memlekettik jastar syilyǵynyń laýreaty atandy. Al 2009 jyly oǵan «Qazaqstannyń eńbek sińirgen qairatkeri» ataǵy berildi.