Almatyda kópqabatty turǵyn úidiń bir páterinde sintetikalyq esirtki óndiretin zerthana jumys istegen. Politsiia zańsyz óndiristi uiymdastyrdy degen kúdikpen 34 jastaǵy qala turǵynyn ustady. Tintý kezinde jalpy salmaǵy 4,5 keli bolatyn esirtki men zerthanalyq jabdyqtar tárkilendi, dep habarlaidy ult.kz.
Ishki ister ministrliginiń málimetinshe, kúdikti turǵyn úi keshenindegi páterdi mefedron óndirýge paidalanǵan. Zerthananyń jumysy kórshilerdiń nazaryn aýdartpaityndai etip uiymdastyrylǵany anyqtaldy.
IIM Esirtki qylmysyna qarsy is-qimyl komitetiniń basqarma bastyǵy Baqytjan Ámirhanovtyń aitýynsha, jedel ýákilder kúdiktiniń áreketin anyqtap, páterge tintý júrgizgen.
Tintý barysynda bir keli daiyn ónim, kristaldary bar alty shyny naýa, dihlormetan quiylǵan alty bótelke, reaktivteri bar toǵyz kanistr, zerthanalyq ydystar, elektrondy tarazylar jáne jeke qorǵanys quraldary tabylǵan. Tárkilengen zattardyń jalpy salmaǵy 4,5 keli bolǵan.
Atalǵan derek boiynsha Qylmystyq kodekstiń 297-1-babymen sotqa deiingi tergep-tekserý bastaldy. Kúdiktige ómir boiyna bas bostandyǵynan aiyrýǵa deiingi jaza taǵaiyndalýy múmkin.
Qazirgi ýaqytta tergeý amaldary jalǵasyp jatyr.
