Pavlodarda úsh balasyna birneshe jyl boiy aliment tólemegen áiel jaýapqa tartyldy. Onyń bereshegi 6 mln 936 myń teńgege jetken. Boryshkerge izdeý jariialanyp, politseiler onyń júrgen jerin anyqtady, dep habarlaidy ult.kz.
Óńirlik politsiia departamentiniń málimetinshe, áieldiń aliment tóleýden jaltarýyna bailanysty oǵan izdeý jariialanǵan. Tártip saqshylary boryshkerdi anyqtap, ákimshilik jaýapkershilikke tartý úshin materialdardy sotqa joldaǵan.
Sot sheshimimen áielge 20 saǵat qoǵamdyq jumysqa tartý jazasy taǵaiyndaldy. Sondai-aq aliment boiynsha bereshegin óteý jáne sot sheshimin oryndaý úshin úsh ai merzim berildi.
Politsiia ókilderiniń eskertýinshe, eger osy merzim ishinde áiel aliment tóleýden qaita jaltarsa, oǵan qatysty qylmystyq jaýapkershilik máselesi qaralady.
Quqyq qorǵaý organdary qarjylyq qiyndyqtarǵa tap bolǵan azamattardy aliment tóleý mindetinen jaltarmai, máseleni zań aiasynda sheshýge shaqyrdy. Ol úshin sotqa nemese jeke sot oryndaýshylaryna júginýge bolady.
