Tanymal ánshi Tóreǵali Tóreáli qasietti Mekke qalasynda balalarǵa táttiler taratyp, olarǵa qýanysh syilaǵan sátin áleýmettik jelide jariialady. Óner iesiniń bul áreketi kópshiliktiń nazaryn aýdardy, dep habarlaidy ult.kz.
Ánshi Instagram paraqshasynda Sáýir taýynda kezdesken búldirshinderge táttiler úlestirgenin aityp, sol sátten alǵan áserimen bólisti. Onyń sózinshe, balalardyń shynaiy qýanyshyn kórý ózine erekshe áser qaldyrǵan.
Óner iesi bul oqiǵany qasietti juma kúni Ál-Haram meshitinde namaz oqyp otyrǵanda qaita esine alǵanyn jetkizdi.
"Keide kishkentai ǵana qýanysh syilaý – úlken bir baqyt. Sáýir taýynda kezdesken balapandarǵa kishkentai tátti syiymyzdy tartý etken edik. Búgin qasietti juma kúni Ál-Haram meshitinde juma namazyn oqyp otyryp, sol bir sátterdi qaita eske aldym", – dep jazdy ánshi.
Tóreǵali Tóreáli balalardyń kúlkisi men qýanyshyn erekshe baǵalaitynyn aityp, oqyrmandaryna izgi tilegin arnady.
"Bala kúlkisinen artyq shattyq joq shyǵar… Alla júregimizge meiirim, qolymyzǵa bereke, jasaǵan árbir jaqsylyǵymyzǵa saýap násip etsin!" – dedi ol.
Ánshiniń jazbasy qaiyrymdylyq pen meiirimdilik taqyrybyn qozǵady. Degenmen jaqsylyqty kópshilikke jariialaýdyń qanshalyqty oryndy ekeni de talqylaýǵa sebep bolatyn másele.
Aita keteiik, Tóreǵali Tóreáli buǵan deiin de Mekkeden jariialaǵan jazbalary arqyly oqyrmandarymen rýhani áserin bólisken.
Tóreǵali Tóreáli kim?
Tóreǵali Tóreáli – qazaqstandyq tanymal estrada ánshisi, burynǵy aitysker aqyn jáne akter. Ol 1992 jyly 14 qazanda Qyzylorda oblysynyń Baiqońyr qalasynda dúniege kelgen.
Óner iesi Almaty qalasyndaǵy Temirbek Júrgenov atyndaǵy óner akademiiasynyń kolledjinde akter mamandyǵy boiynsha bilim alǵan. Shyǵarmashylyq jolyn aitys ónerinen bastap, stýdentter arasyndaǵy birneshe aitysta jeńimpaz atanǵan. Sondai-aq respýblikalyq aqyndar aitysyna qatysyp, júldeli oryndarǵa ie bolǵan.
Keiin estradaǵa bet buryp, "Otandy súiý – imannan" áni arqyly kópshilikke keńinen tanyla bastady
Ánshi óner áleminde "Uly dala balasy" degen atpen de belgili.
Onyń repertýarynda "Saǵynysh", "Erke qyz", "Naizaǵai bolyp" jáne "Túsimdegi qyz" siiaqty ánder bar.
2015 jyly "Uly dala balasy" atty jeke shyǵarmashylyq keshin ótkizip, onyń televiziialyq nusqasy "Qazaqstan" ulttyq arnasynan kórsetildi.
Óner iesiniń jubaiy – Tolqyn Turarbekqyzy, ekeýi otbasylyq ómirindegi jańalyqtardy áleýmettik jelide bólisip otyrady.
