Birin stýdenttik shaq jaqyndastyrsa, endi biriniń tanystyǵy kontsertte nemese teletúsirilimde bastalǵan. Otandyq shoý-bizneste óner arqyly joly túiisip, keiin otbasyn qurǵan juptar az emes. Olardyń alǵashqy kezdesýi qalai ótti, áriptestik qai kezde mahabbatqa ulasty? Ult.kz tilshisi óner toǵystyrǵan 4 juptyń tanysý tarihyn usynady.
Janbolat Erbatyrov pen Jazira Baiyrbekova
Janbolat pen Jaziranyń tanystyǵy Almatydaǵy estrada-tsirk kolledjinde bastalǵan. Óner qýyp kelgen eki jastyń joly stýdenttik shaqta túiisken. Jaziranyń aitýynsha, Janbolat oǵan birden sezimin bildirmegen. Sabaqtan keiin birge qaityp, áńgimelesip, birte-birte jaqyndai túsken.
Janbolat keide jataqhanaǵa eki aialdama qalǵanda avtobýstan túsip, jaiaý júrýdi usynatyn bolǵan. Alǵashynda mundai kezdesýlerge asa mán bermegen Jazira keiin onyń yqylasyn baiqaǵan. Ekeýiniń dostyǵy osylaisha mahabbatqa ulasqan.
Jastar aldymen shańyraq kóterip, keiin shyǵarmashylyq dýet qurǵan. Úlken sahnaǵa shyqqanǵa deiin meiramhanada án aityp, qajetti mýzykalyq qurylǵylaryn ózderi satyp alǵan. Búginde kópshilik olardy jeke oryndaýshylardan buryn, esimderi qatar atalatyn ánshi jup retinde tanidy.
Toqtar Serikov pen Beibit Seidýálieva
Toqtar Serikov bolashaq jaryn alǵash ret 2000 jyly «Nur-Muqasan» tobynyń kontsertinde kórgen. Sol keshte Beibittiń daýysy ánshige erekshe áser qaldyrǵan. Toqtar onyń ónerine súisinip, jaqynyraq tanysýǵa niettengen.
Ánshi keiingi suhbattarynyń birinde Beibittiń nazaryn aýdarý úshin aport almasyn syilaǵanyn eske alǵan. Degenmen ekeýiniń araqatynasy birden ǵashyqtyqqa ulaspaǵan. Olar uzaq ýaqyt aǵa-qaryndas retinde aralasqan.
Ortaq kontsertter men birge oryndaǵan ánder qos ónerpazdy jaqyndata túsken. Beibit 2002 jyly Toqtardyń shyǵarmashylyq keshinde de sahnaǵa shyqqan. Birneshe jylǵa sozylǵan tanystyqtan keiin ekeýi 2007 jyly otbasyn qurǵan. Osylaisha sahnadaǵy seriktestik ómirlik odaqqa ainalǵan.
Qydyráli Bolmanov pen Qaraqat Ábildina
Qydyráli men Qaraqat úshin 1 jeltoqsan — alǵashqy kezdesýdi eske túsiretin erekshe kún. Olar 1996 jyly mereitoi keshinde tanysqan. Ol kezde Qydyráli «ABK» toby arqyly tanylyp úlgerse, Qaraqat konservatoriiada bilim alyp júrgen.
Qaraqattyń esteliginshe, sol keshte «ABK» tobyn ózderine qarama-qarsy ústelge otyrǵyzǵan. Ekeýiniń kózqarasy birneshe ret túiisip, jas ánshi uialyp qalǵan. Keiin Qydyráli onyń ónerine jyly pikir aityp, shyǵaryp salýdy usynǵan.
Alǵashqy kezdesýden keiin Qydyráli Qaraqatty jataqhanasyna izdep kelgen. Tanystyqtary jalǵasyp, jastar 1999 jylǵy 20 tamyzda shańyraq kótergen. Keiin jeke shyǵarmashylyqtaryn qatar damytyp, birge de án oryndady. Olardyń ortaq tarihynda óner alǵashqy tanystyqqa sebep bolyp, otbasylyq ómiriniń de bir bóligine ainalǵan.
Búrkit pen Aisha
Búrkit pen Aishanyń qarym-qatynasynda shyǵarmashylyq áriptestiktiń orny bólek. Búrkit bolashaq jarynyń prodiýseri bolyp, onyń ánshilik jolyn bastaýyna kómektesken. Án tańdaý, stýdiiadaǵy jumys pen beinebaian túsirilimderi ekeýin jaqyndata túsken.
2009 jyly Aishanyń «Raba liýbvi» ánine beinebaian jaryq kórgen. Týyndynyń mýzykasyn Búrkit jazǵan. Keiin olardyń kásibi bailanysy jeke ómirde jalǵasyp, qos ónerpaz 2010 jyly otbasyn qurǵan.
Búrkit suhbattarynda Aishaǵa úilený týraly usynys jasaǵanymen, onyń birden kelise qoimaǵanyn aitqan. Soǵan qaramastan, tanystyqtary nekege ulasqan. Keiin tyńdarman olardy jeke ánshiler retinde de, sahnada birge óner kórsetetin dýet retinde de qabyldady.
