Qazaqstanda Ulttyq panteonǵa jerlenýge quqyǵy bar memlekettik qyzmetshilerdiń tizimi jańartyldy. Úkimettiń tiisti qaýlysy 2026 jylǵy 17 qarashadan bastap kúshine enedi, dep habarlaidy ult.kz.
Ózgerister 4 qarashada qabyldanǵan Úkimet qaýlysymen bekitildi. Jańa tizimge myna laýazym ieleri engizilgen:
- Vitse-prezident, Premer-ministr jáne onyń orynbasarlary;
- Quryltai tóraǵasy jáne onyń orynbasarlary;
- Qazaqstan Halyq Keńesiniń tóraǵasy jáne onyń orynbasarlary;
- Parlament palatalarynyń tóraǵalary men orynbasarlary;
- Memlekettik hatshy jáne memlekettik keńesshi;
- Prezident Ákimshiliginiń basshysy;
- Konstitýtsiialyq Sot, Joǵarǵy Sot jáne Ulttyq bank tóraǵalary;
- Qaýipsizdik Keńesi tóraǵasynyń orynbasary;
- Ministrler men Prezidentke tikelei baǵynatyn memlekettik organdardyń basshylary;
- Astana, oblystar jáne respýblikalyq mańyzy bar qalalardyń ákimderi.
Sonymen qatar Prezidenttiń arnaiy sheshimimen basqa da Qazaqstan azamattaryn Ulttyq panteonǵa jerleýge ruqsat etilýi múmkin.
Jerleý rásimin kim uiymdastyrady?
Jerleý rásimin uiymdastyrý mindeti Astana, oblystar men respýblikalyq mańyzy bar qalalardyń jergilikti atqarýshy organdaryna júkteledi.
Oǵan marqumnyń jubaiy, jaqyn týystary nemese zańdy ókili bastamashy bola alady. Jergilikti atqarýshy organdar qujattardy rásimdeý, qajetti jerleý jabdyqtaryn usyný, máiitti panteonǵa jetkizý jáne jerleý jumystaryn uiymdastyrady.
Marqum týraly qandai málimet saqtalady?
Ulttyq panteonda jerlengen adamdar týraly arnaiy tirkeý kitaby júrgiziledi. Oǵan marqumnyń aty-jóni, týǵan jáne qaitys bolǵan kúnderi, máiittiń jetkizilgen jáne jerlengen ýaqyty, ómirbaiany men Qazaqstan aldyndaǵy eńbegi týraly málimetter engiziledi.
Jańa qaýly 2026 jylǵy 17 qarashada kúshine enedi.
