«Qazaqmys» korporatsiiasy Ulytaý, Qaraǵandy jáne Abai oblystaryndaǵy qoldanystaǵy ken oryndary men keleshegi bar ýchaskelerde keń aýqymdy geofizikalyq zertteýler júrgizip jatyr. Jer qoinaýynyń geologiialyq qurylymyn dál zerdeleý jáne taý-ken jumystaryn josparlaý sapasyn arttyrý maqsatynda kásiporyn elektrlik jáne magnittik barlaýdy, ushqyshsyz ushý apparattary arqyly aerosýretke túsirýdi, sondai-aq lazerlik 3D-skanerleýdi belsendi qoldanýda, dep habarlaidy Ult.kz.
Mańyzdy jobalardyń biri retinde «Qazaqmys» Tobynyń quramyna kiretin Qazaq Geophysics kompaniiasynyń Ulytaý oblysyndaǵy Tasqura ýchaskesinde bastaǵan elektrlik barlaý jumystaryn atap ótýge bolady. Uzaqtyǵy 156 qýma shaqyrymdy quraityn bul zertteý aiasynda mamandar 500 metr tereńdikke deiingi geologiialyq qurylymdy zerdelep, mys-sýlfidti mineraldaný belgileri bar aimaqtardy anyqtaýdy kózdep otyr. Jobanyń 15 shaqyrymy 2026 jyldyń sońyna deiin, al qalǵan 141 shaqyrymy 2027 jyly oryndalady.
Geofizikalyq barlaý jumystary basqa óńirlerde de qarqyndy júrip jatyr. Abai oblysyndaǵy Qusmuryn-Aqbastaý ken alańynda 52,4 shaqyrymdyq elektrlik barlaý aiaqtalyp, uńǵymalarda qosymsha zertteýler josparlandy.
Qaraǵandy oblysyndaǵy Burnaq alańynda 702 shaqyrym jer ústi magnittik barlaýy, al Qyzyladyr ýchaskesinde 19,5 sharshy shaqyrym aýmaqty qamtityn jumystar oryndaldy. Sonymen qatar Moldybai ýchaskesinde 310 shaqyrymdyq magnittik barlaýdyń alǵashqy kezeńi aiaqtaldy.
Óndiristi tsifrlandyrý baǵytynda Abyz kenishindegi karerdi ushqyshsyz apparattar arqyly túsirý jáne Jylandy kenishiniń jer asty qazbalarynda lazerlik 3D-skanerleý júrgizildi.
Alynǵan derekter ken oryndarynyń úsh ólshemdi tsifrlyq modelderin ázirleýge, karerlerdiń paidalaný merzimin uzartýǵa jáne taý-ken jumystaryn joǵary dáldikpen josparlaýǵa múmkindik beredi. Zamanaýi tehnologiialardy qoldaný korporatsiianyń mineraldyq-shikizat bazasyn keńeitýge jáne óndiristik sheshimderdiń ǵylymi negizdiligin qamtamasyz etýge baǵyttalǵan.
