Almatydaǵy Sátbaev kóshesiniń boiyndaǵy aryqtardyń bir bóligi arnaiy plitalarmen jabylyp jatyr. Qalalyq Qoǵamdyq keńistikterdi damytý basqarmasy bul jumystardyń ne úshin júrgizilip jatqanyn túsindirdi, dep habarlaidy ult.kz.
Jumys barysy túsirilgen video áleýmettik jelide tarady. Kadrlardan jumysshylardyń aryq júiesiniń ústine arnaiy plitalar ornatyp jatqanyn kórýge bolady. Jeli qoldanýshysy munyń sebebin suraǵan.
Qalalyq basqarmanyń málimetinshe, qazir Sátbaev kóshesiniń Baizaqov kóshesinen Lýganskii kóshesine deiingi aralyǵynda keshendi abattandyrý jumystary júrgizilip jatyr.
Joba aiasynda jaiaý júrginshiler jolyn keńeitý, veloinfraqurylym salý, kógaldandyrý jáne syrtqy jaryqtandyrý júiesin jańǵyrtý qarastyrylǵan.
Atap aitqanda, Músirepov kóshesimen qiylysatyn tustaǵy Sátbaev kóshesiniń ońtústik bóliginde aryq júiesiniń shamamen 5-7 metr jeri arnaiy plitalarmen jabylady.
Basqarma ókilderi mundai sheshim velosipedshilerdiń qaýipsiz ári úzdiksiz qozǵalýyna múmkindik beretinin aitty. Sonymen qatar bul tásil jasyl jelek aýmaǵyn aitarlyqtai qysqartpaýǵa jaǵdai jasaidy.
«Aryq júiesi saqtalady, onyń jaýyn-shashyn sýyn burý qyzmeti ózgermeidi. Jabylǵan bólik jergilikti sipatta bolady jáne sý aǵatyn naýalardy keiin de tazalap, kútip ustaýǵa múmkindik qarastyrylǵan», – dep túsindirdi vedomstvo.
Basqarma ókilderiniń aitýynsha, jumystar bekitilgen joba aiasynda júrgizilip jatyr. Negizgi maqsat – qoldanystaǵy sý burý júiesin saqtai otyryp, jaiaý júrginshiler men velosipedshilerge qolaily jaǵdai jasaý.
