Tanymal ánshi Ashat Tarǵyn aqtóbelik ónerpaz Jánibek Bekbosynovtyń qaitys bolǵanyna bailanysty qaiǵysyn bildirip, marqum týraly esteligimen bólisti, dep habarlaidy ult.kz.
Ánshi áleýmettik jelidegi paraqshasynda áriptesiniń ómirden ótkeni ózine aýyr tigenin jazdy. Ol Jánibek Bekbosynovpen talai jyl aralasyp, sahnada birge án shyrqaǵanyn jáne túrli óner saparlarynda qatar júrgenin eske aldy.
"Jánibek Bekbosynov, jerlesim, zamandasym, talantty ánshi rabbysyna qaitty degen habar estip, kóńilim túsip otyr. Aqtóbede talai kontsertte birge júrip edik, talai saparlas bolyp edim. Alla janyńdy jánnatta shalqytsyn! Óte jaqsy jigit edi. Otbasyna qaiǵyra kóńil aitamyn", – dep jazdy Ashat Tarǵyn.
Óner iesi marqumnyń adamgershiligi men ónerdegi ornyn erekshe atap ótip, onyń jaqyndaryna kóńil aitty.
Aita keteiik, buǵan deiin Aqtóbe jurtshylyǵyna keńinen tanylǵan ánshi, termeshi ári ustaz Jánibek Bekbosynovtyń dúnieden ótkeni belgili bolǵan edi.
Marqum Ǵaziza Jubanova atyndaǵy Aqtóbe oblystyq filarmoniiasynda uzaq jyl solist bolyp eńbek etken. Ol óńirdiń mádeni ómirine belsene aralasyp, ulttyq ónerdiń órkendeýine úles qosty.
Jánibek Bekbosynov qazaqtyń halyq ánderi men termelerin oryndaýmen qatar, estrada janrynda da tyńdarman yqylasyna bólengen. Óner jolynda respýblikalyq jáne halyqaralyq baiqaýlarǵa qatysyp, birneshe márte laýreat atanǵan.
