Belgili akter Qýandyq Qystaqbaev ákesiniń jasy ulǵaiǵan shaǵynda dúniege kelgenin aityp, kópshilik bile bermeitin otbasylyq tarihymen bólisti. Óner iesi bul týraly Láilá Sultanqyzyna bergen suhbatynda áńgimeledi, dep habarlaidy ult.kz.
Akterdiń aitýynsha, ákesi ony 78 jasynda súigen. Ol ákesiniń ekinshi áielinen týǵanyn da jasyrmady. Qystaqbaev suhbat barysynda ata-anasynyń qalai shańyraq kótergenin jáne otbasy bastan ótkergen qiyndyqtardy eske aldy.
"Ákemniń 78 jasynda dúniege keldim. Tańdaiymdy kóterip qoiaiyn, ras aitamyn. Ekinshi áielinen bolamyn. Birinshi áieli on shaqty qursaq kótergen ol kisi de", – dedi akter.
Óner iesiniń sózinshe, ákesiniń alǵashqy jary birneshe bala bosanǵanymen, olardyń kóbi shetinep ketken. Keiin bes-alty jasqa tolǵan qyzy bar kezde áieli ómirden ótken. Arada bir jyl ótken soń ákesi Qýandyq Qystaqbaevtyń anasymen shańyraq kótergen. Ol kezde bolashaq akterdiń anasy nebári 16 jasta bolǵan.
"Sosyn bir jyldan keiin meniń sheshemdi 16 jasynan alady. Sóitip ol kisige 10-12 qursaq kótertedi, 1972, 1974 jylǵy aǵam bar", – dep bólisti akter.
Qýandyq Qystaqbaev ákesi ómirden ótkende óziniń on jasta bolǵanyn da aitty. Sol kezde ákesi 88 jasqa kelgen eken.
"Bári toqaldyń balasy shyǵarsyń dep aitady. 88 jasynda, men 10-da bolǵanda qaitys boldy", – dedi ol.
Akter suhbat sońynda ákesi men anasynyń jas aiyrmashylyǵy týraly da sóz qozǵady. Onyń aitýynsha, ata-anasynyń jas aiyrmashylyǵy 34 jyl bolǵan.
Qýandyq Qystaqbaev bul jaǵdaidy belgili qalamgerler Ákim Tarazi men Roza Muqanovanyń otbasymen salystyrdy.
Osylaisha, akter kópshilikke buryn aityla bermegen otbasylyq tarihyn baiandap, balalyq shaǵyna qatysty estelikterimen bólisti.
Qýandyq Qystyqbaev kim?
Qýandyq Qystyqbaev – qazaqstandyq teatr jáne kino akteri, Qazaqstannyń eńbek sińirgen qairatkeri. Ol 1977 jyly 1 tamyzda Almaty oblysy Uiǵyr aýdanynda dúniege kelgen.
1998 jyly T. Júrgenov atyndaǵy Qazaq memlekettik teatr jáne kino institýtyn támamdap, eńbek jolyn Qalibek Qýanyshbaev atyndaǵy qazaq mýzykalyq drama teatrynda bastaǵan. Óner iesi teatr sahnasynda "Abai", "Qara qypshaq Qobylandy", "Qaragóz", "Eńlik-Kebek" siiaqty qoiylymdarda túrli rólderdi somdaǵan.
Kórermenge "Kelin", "Jat", "Tomiris" filmderi jáne Qasym Qaisenovtiń beinesin somdaǵan "Qasym" týyndysy arqyly da tanyldy.
2015 jyly oǵan "Qazaqstannyń eńbek sińirgen qairatkeri" qurmetti ataǵy berildi, al 2020 jyly Qalibek Qýanyshbaev atyndaǵy teatrdyń kórkemdik jetekshisi qyzmetine taǵaiyndaldy.
