Qazaqstandyq óner ieleriniń arasynda plastikalyq hirýrgtiń kómegine júgingenin ashyq aitqandar bar. Biri qabaǵyn túzetse, endi biri dene bitimine ózgeris engizgen, dep habarlaidy ult.kz.
Aigúl Imanbaeva
Ánshi ári aktrisa Aigúl Imanbaeva 2023 jyly qabaǵyna blefaroplastika jasatqanyn áleýmettik jelide jariialaǵan. Óner iesi hirýrgtiń kómegine júginýge uzaq daiyndalyp, aqyry sheshim qabyldaǵanyn aitqan.
“Blefaroplastikaǵa bara jatyrmyn. Aqyry jasatýǵa bel býdym”, – degen ánshi.
Otadan keiin Aigúl Imanbaeva oqyrmandaryna áserimen bólisip, nátijesin kórsetetinin jetkizgen.
Aiqyn Tólepbergen
Aiqyn Tólepbergen de qabaǵyn túzetkenin jasyrmaǵan. Ánshi Timýr Balymbetovke bergen suhbatynda 2021 jyldyń qysynda blefaroplastika jasatqanyn aitqan.
Onyń sózinshe, ýaqyt óte qabaǵy tómen túse bastaǵan. Sondyqtan mamannyń keńesine qulaq asyp, ota jasatýǵa kelisken. Hirýrgiialyq túzetýdi óziniń jaqyn dosyna senip tapsyrǵan.
“Qabaǵym túsip ketipti. Ýaqytynda osylai kóterip qoisań durys bolady degen soń, jasattym”, – dep túsindirgen óner iesi.
Zarina Omarova
Zarina Omarova kózine plastikalyq ota jasatqanyn Jetinshi arnanyń “Qyzdar-ai” baǵdarlamasynda aitqan. Ánshi mundai ózgeristi burynnan oilap júrgenin jetkizgen.
“Tek qana kózimdi jasatamyn deitinmin. Óitkeni kózim kishkentaiymnan syqsi bolatyn”, – degen ol.
Óner iesi áleýmettik jelide kóziniń pishinine qatysty pikirler jazylatynyn da sóz etken. Onyń osy málimdemesi 2023 jylǵy naýryzda jariialanǵan.
Álisher Kárimov
Álisher Kárimov Ashat Sadyrbaiǵa bergen suhbatynda ústińgi qabaǵyndaǵy artyq terini aldyrǵanyn baiandaǵan. Ánshiniń aitýynsha, qabaǵy túsip, uiqydan turǵan kezde beti sharshańqy kórine bergen.
Ol osy máseleni túzetý úshin Sankt-Peterbýrgtegi mamandarǵa júgingen. Ánshi ota shamamen 40 minýtqa sozylǵanyn aitqan.
Álisher suhbatta bul ózgeristi ózi “plastikalyq ota” dep atamaǵanymen, qabaǵyna hirýrgiialyq túzetý jasalǵanyn ashyq sipattaǵan. Sondai-aq sahnada júrgen adam úshin syrtqy kelbetine kútim jasaý mańyzdy ekenin jetkizgen.
Lýina
Lýina keýdesin úlkeitý úshin plastikalyq ota jasatqanyn ózi rastaǵan. Ánshi áleýmettik jelide oqyrmandarynyń pikirlerine jaýap berý kezinde 2018 jyly keýdesine implant qoidyrǵanyn aitqan.
Óner iesiniń sózinshe, ol bul qadamǵa barmas buryn uzaq oilanǵan. Keiin sheshim qabyldap, ota jasatqan. Lýina nátijesine kóńili tolatynyn da jasyrmaǵan.
