Tanymal aktrisa Juldyz Ábdikárimova tuńǵysh uly Narulǵa kópten kútken tulparyn syilady. Óner iesi qýanyshty sáttiń beinejazbasyn áleýmettik jelidegi paraqshasynda jariialady, dep habarlaidy ult.kz.
Aktrisanyń aitýynsha, uly birneshe jyldan beri at sportymen shuǵyldanyp keledi. Osy ýaqyt ishinde túrli jarystarǵa qatysyp, júldeli oryndarǵa da ie bolǵan. Alaida jeńispen qatar, talai qiyndyqty bastan ótkergen.
"Talai attan qulady. Qolyn da, aiaǵyn da, belin de jaraqattap aldy. Sonda da jylqyǵa degen mahabbaty jyl ótken saiyn arta berdi", – dep jazdy aktrisa.
Juldyz Ábdikárimovanyń sózinshe, Narul atqa minýdi úirene bastaǵan kezden-aq jeke tulpary bolǵanyn armandaǵan. Ulynyń bul tilegin jaqsy biletin ata-anasy onyń jai ǵana balalyq qyzyǵýshylyq emes ekenine kóz jetkizýdi jón kóripti.
"Alǵashqy jyldan-aq óziniń jeke tulpary bolǵanyn armandady. Surady, qalady, kútti. Al ákesi ekeýmiz balalyq qyzyǵýshylyq pa, álde shynaiy qushtarlyq pa, ýaqyt kórsetsin dep sheshtik", – dedi ol.
Aktrisa ulynyń at sportyna degen yqylasy ýaqyt ótken saiyn kúsheie túskenin jetkizdi. Narul qoly qalt etse, atqoraǵa asyǵyp, bos ýaqytyn jylqylardyń janynda ótkizetin bolǵan.
"Mektepten bosai sala atqoraǵa júgiredi. Attardy shomyldyrady, astyn tazalaidy, jem-sýyn beredi. Keide úige tún aýa bir-aq oralady", – dep bólisti Juldyz.
Balasynyń jylqyǵa degen erekshe súiispenshiligin baiqaǵan ata-anasy biyl onyń kópten kútken armanyn oryndaýdy uiǵarǵan. Olar Narulǵa ózi tańdaǵan tulparyn satyp alyp bergen.
"Osynyń bárin kórip, balamyzdyń bul jai ǵana qyzyǵýshylyǵy emes, júrek qalaýy ekenin túsindik. Biyl kópten kútken armanyn oryndap, ózi tańdaǵan sáigúligin alyp berdik!" – dep jazdy óner iesi.
Aktrisa qýanyshty sátke ulynyń ákesi Qairat Nurtastyń qatysa almaǵanyn da jasyrmady. Onyń aitýynsha, ánshi issaparǵa bailanysty tulpardy tabystaý rásimine úlgermegen.
"Issaparǵa bailanysty tulparyn tabystaý sátine Qairek úlgerip kele almady. Biraq bul kúndi ulymen birge ákesi de qanshalyqty kútkenin men jaqsy bilemin", – dedi aktrisa.
Juldyz Ábdikárimova jazbasynyń sońynda ulyna aq tilegin arnap, jańa tulparynyń qutty bolýyn tiledi.
"Qulynym, azamatqa qazanat serik bolsyn! Tulparyń qutty bolsyn! Taqymyńnan tulpar, basyńnan baq taimasyn!" – dep jazdy ol.
Óner iesiniń bul jazbasy áleýmettik jelide kópshiliktiń nazaryn aýdardy. Jeli qoldanýshylary Naruldyń qýanyshyna ortaqtasyp, jas shabandozǵa sáttilik tiledi.
