Belgili aktrisa ári prodiýser Dariǵa Badyqova balalyq shaǵynda kórgen joqshylyqty eske alyp, suhbat barysynda kóz jasyna erik berdi, dep habarlaidy ult.kz.
Óner iesi Ainur Asanberdige bergen suhbatynda bala kúninde otbasynyń turmysy aýyr bolǵanyn jasyrmady. Aitýynsha, úide keide qant pen kúndelikti tutynatyn azyq-túliktiń ózi tabylmai qalatyn. Sondai kezderi kishkentai Dariǵa qarap otyrmai, jaqyndaryna kómektesýdiń jolyn izdegen.
Aktrisa aýyl kóshelerin aralap, án aityp, turǵyndar bergen azyq-túlikti úiine tasityn bolǵan. Onyń bar armany – baýyrlarynyń qarny toq bolýy.
"Men Dariǵaǵa rizamyn. Ýff, jylamaimyn dep edim. Jurt meni jylamaidy dep oilaidy. Men kishkentai kezimde "qant joq, basqa joq" dese, "nege joq, tabý kerek qoi" degen oi bolatyn. Qalai joq bolady ol? Nege joq dep oilaitynmyn", – dedi aktrisa.
Dariǵa Badyqova sol kezdegi áreketin esine alyp, tapqanyn ózi jemei, úidegi baýyrlaryna jetkizýge asyqqanyn aitty.
"Sonda túste árbir kóshege shyǵyp, án aitatynmyn. "Qant, alma, qurt" dep án aitsam, árkim qolyndaǵysyn beretin. Olardy jinap, úige alyp keletinmin. Inim men ápkemniń jegenine máz bolatynmyn. Solar jese eken, solar ishse eken dep oilaitynmyn", – dep eske aldy ol.
Óner iesiniń sózinshe, aýyl turǵyndary ony jaqsy kórip, qoldarynan kelgenshe kómektesken. Ol jurt demalyp jatqan túski ýaqytta tórt-bes kósheni aralap, án shyrqaityn bolǵan. Balalyq shaǵy týraly áńgimelegen aktrisa týǵan aýylyna degen alǵysyn da bildirdi. Ótken kúnderdi eske alý oǵan ońai timei, suhbat kezinde kóńili bosap, jylap qaldy.
Áleýmettik jeli qoldanýshylary aktrisanyń áńgimesine áserlenip, onyń kishkentaiynan baýyrlaryna qamqor bolǵanyn atap ótti. Kópshilik óner iesine jyly lebizin bildirdi.
