Mysyrda jolaýshylar poiyzdarynyń soqtyǵysýy saldarynan 4 adam qaza taýyp, 100-ge tarta adam túrli jaraqat aldy, dep habarlaidy ult.kz.
Apat 8 qarashada El-Aiat aýdanynda bolǵan. Mysyr Kólik ministrliginiń málimetinshe, Gizadan Faiiýmge baǵyt alǵan №134 poiyz Kairden Asýanǵa bara jatqan №2010 poiyzdyń artqy bóligine soǵylǵan. Soqqy saldarynan tórt vagon relsten shyǵyp, aýdarylyp ketken. Osydan keiin eldiń ońtústik óńirlerine qatynaityn poiyzdardyń qozǵalysy eki baǵytta da ýaqytsha toqtatyldy.
Densaýlyq saqtaý ministrliginiń málimetinshe, apattan tórt adam qaza taýyp, taǵy 88 adam jaraqat alǵan. Oqiǵa ornyna 72 jedel járdem kóligi jiberilgen. Zardap shekkender úsh meditsinalyq mekemege jetkizildi. Onyń ishinde 49 adam El-Vasta aýrýhanasyna, 29 adam El-Aiat aýrýhanasyna, taǵy 10 adam El-Atfiha aýrýhanasyna jatqyzylǵan.
Alaida Masrawy basylymy óz derekkózine silteme jasap, zardap shekkender sany shamamen 150 adamǵa jetkenin habarlady. Olardyń basym bóligi súiek synýy men túrli jaraqat alǵan. Basylym málimetinshe, zardap shekkenderdi esepteý jumystary áli jalǵasyp jatyr.
Mamandar poiyzdardyń soqtyǵysýyna qatysty eki negizgi boljamdy qarastyryp jatyr. Birinshisi – temirjoldaǵy signal berý júiesiniń isten shyǵýy. Tehnikalyq aqaý saldarynan mashinist toqtaýy tiis bolǵanyna qaramastan, qozǵalysty jalǵastyrýǵa ruqsat alǵan bolýy múmkin.
Ekinshi boljam boiynsha, mashinist baǵdarsham signaldary men poiyz qozǵalysyn retteitin nusqaýlyq talaptaryn oryndamaǵan bolýy yqtimal. Ázirge bul nusqalardyń eshqaisysy resmi túrde rastalǵan joq.
Oqiǵanyń mán-jaiyn anyqtaý úshin arnaiy tehnikalyq komissiia quryldy. Mamandar apat bolǵan aýmaqty tekserip, temirjol jabdyqtarynyń jaǵdaiyn zerttep, poiyz qozǵalysyn uiymdastyrý kezinde zańbuzýshylyqtardyń bolǵan-bolmaǵanyn anyqtaýy kerek.
Mysyr prezidenti Abdel Fattah as-Sisi zardap shekkenderge qajetti meditsinalyq kómek kórsetýdi jáne tergeý jumystaryn jedeldetýdi tapsyrdy. Bas prokýratýra da oqiǵa ornyna tergeý tobyn jiberip, tehnikalyq saraptama júrgizýdi talap etti.
Aita keteiik, El-Aiat aýdany buǵan deiin de iri temirjol apattarymen belgili bolǵan. 2002 jyldyń aqpanynda osy aýmaqta eldiń ońtústigine baǵyt alǵan jolaýshylar poiyzynda órt shyǵyp, júzdegen adam qaza tapqan.
2016 jyly bul aýdanda taǵy úsh temirjol oqiǵasy tirkelgen. Ol kezde 14 adam kóz jumyp, 30 adam jaraqat alǵan.
Mysyrdyń Ortalyq qoǵamdyq jumyldyrý jáne statistika agenttiginiń dereginshe, 2025 jyly elde 170 temirjol apaty bolǵan. Al 2024 jyly bul kórsetkish 220-ny quraǵan. Osylaisha, oqiǵalar sany 22,7 paiyzǵa azaiǵan. Degenmen 2025 jyly temirjol apattarynan 39 adam qaza taýyp, taǵy 139 adam jaraqat alǵan.
Sonymen qatar Mysyrda temirjol infraqurylymyn jańǵyrtý jumystary jalǵasyp keledi. 2014-2024 jyldar aralyǵynda kólik júiesin damytýǵa shamamen 225 milliard mysyr fýnty bólingen. Soǵan qaramastan, kezekti apat eldegi temirjol qaýipsizdigi máselesin qaita kóterdi.
