Eýropada jalǵan jarylys qaýpi týraly habarlamalar tolqyny kúsheidi. Bul joly belgisiz bireýler telearnalardy nysanaǵa aldy, dep habarlaidy ult.kz.
Birneshe eýropalyq telearnaǵa elektrondy poshta arqyly jarylys jasalatyny týraly qoqan-loqy hattary jiberilgen. Mundai habarlamalar Irlandiianyń RTE teleradiokompaniiasyna, Ulybritaniianyń Sky jáne Bolgariianyń Nova TV telearnalaryna túsken. Tekserý barysynda jarylǵysh zattar tabylǵan joq, dep habarlaidy Reuters.
Qaýipke bailanysty RTE telearnasy shamamen úsh saǵat boiy mýzyka men aldyn ala jazylǵan habarlamalardy efirge shyǵarǵan. Al Nova TV redaktsiiasynyń qyzmetkerleri ǵimarattan evakýatsiialanǵan.
Hattar Mihail Andropov esimdi belgisiz adamnyń atynan jiberilgen. Hat avtory buǵan deiin Eýropadaǵy áýe reisterine qatysty jalǵan jarylys habarlamalaryn da ózi taratqanyn málimdegen. Telearnalarǵa joldanǵan hatta jarylǵysh qurylǵy 45 minýttan keiin iske qosylatyny jazylǵan. «Batysqa joldanǵan úndeý» dep atalǵan habarlama avtory osy aptada bolǵan oqiǵalar tek bastamasy ekenin de eskertken.
Buǵan deiin Eýropanyń birqatar áýe kompaniialaryna da ushaqtarǵa jarylǵysh zat qoiylǵany týraly habarlamalar túsken bolatyn. Sonyń saldarynan keibir ushaqtar shuǵyl qonýǵa májbúr bolyp, áýejailarda qosymsha tekserýler júrgizildi. Alaida ol jaǵdailarda da jarylǵysh qurylǵylar tabylǵan joq. Jalǵan habarlamalardy kim taratyp júrgeni ázirge belgisiz.
Italiianyń Ansa agenttiginiń málimetinshe, habarlamalardyń bir bóligi Reseidegi «Mýjskoe gosýdarstvo» qozǵalysynyń músheleriniń atynan jiberilgen. Alaida qozǵalystyń negizin qalaýshy Vladislav Pozdniakov bul iske qatysy baryn joqqa shyǵardy. Onyń aitýynsha, qozǵalys 2021 jyly-aq óz jumysyn toqtatqan.
