Qazirgi saiasatta imidj tek resmi minberde qalyptaspaidy. Instagram-daǵy qysqa video, mýzyka nemese bir ǵana ishara saiasatkerge buryn tanymaǵan aýditoriianyń da nazaryn aýdara alady. Armeniia premer-ministri Nikol Pashiniannyń jelidegi beiresmi jariialanymdary – osy qubylystyń kórneki mysaly.
Pashiniannyń mýzyka tyńdap, kameraǵa qolymen júrek belgisin kórsetetin beineleri áleýmettik jelide jii taralady. 2025 jylǵy 21 qarashada Astanaǵa sapary kezinde ol Instagram-da qazaqstandyq ánshi BAYANSULU oryndaǵan «Aua Rai» ánimen video jariialady. Beinejazbanyń sońynda júrek isharasyn jasap, oqyrmandaryna jyly tilek bildirdi. Bul sátti qazaqstandyq aqparat quraldary da jazdy.
Saiasi marketing turǵysynan mundai tásil «personalizatsiia» dep atalady: saiasatker laýazym iesi retinde ǵana emes, talǵamy, emotsiiasy jáne kúndelikti ádetteri bar adam retinde kórinedi. Mýzykalyq súiemeldeý, qarapaiym kadrlar men qaitalanatyn júrek isharasy onyń tsifrlyq beinesiniń tanylatyn elementterine ainalady. Bul saiasatty turaqty qadaǵalamaityn adamdarǵa da jetýge múmkindik beredi. Ádistiń artyqshylyǵy – aýditoriia nazaryn tartý jáne resmi qarym-qatynastan bólek emotsiialyq bailanys qurý múmkindigi. Alaida videony unatý saiasatkerdiń naqty sheshimderin qoldaý degendi bildirmeidi. Áleýmettik jelide qalyptasqan jaǵymdy áser men saiasi qyzmettiń nátijesin shatastyrý – imidjdik kommýnikatsiianyń basty táýekelderiniń biri.
Sondyqtan beiresmi kontentti baǵdarlamalar men sheshimder týraly túsinikti aqparat, ashyq suraq-jaýap jáne naqty eseptilikpen tolyqtyrǵan jón. Pashinian mysaly bir nárseni anyq kórsetedi: qazirgi saiasi brend tek sózden emes, mýzykadan, kadrdan jáne simvoldan da quralady. Biraq senimdi imidjdiń ólshemi – tek qaralym sany emes, sóz ben istiń sáikestigi.
Aizere Musabek ,
Ál-Farabi atyndaǵy Qazaq Ulttyq ýniversitetiniń
saiasattaný mamandyǵynyń magistranty
