Qazaqtyń áigili ánshisi, Halyq qaharmany Roza Baǵlanovanyń kelini Maral enesiniń kópshilik bile bermeitin qyrlaryn eske aldy. Ol óner iesiniń kúndelikti ómirdegi qarapaiymdylyǵy, bala tárbiesine kózqarasy jáne otbasyndaǵy qarym-qatynasy týraly syr shertti, dep habarlaidy ult.kz.
Prodiýser Áliia Qudaibergenova áleýmettik jelidegi paraqshasynda Roza Baǵlanovanyń 15 jyl turǵan shańyraǵyna arnaiy barǵanyn jazdy. Ol ánshiniń kelini Maralmen áńgimelesip, óner iesine qatysty buryn aitylmaǵan estelikterdi tyńdaǵan.
"Ańyz adamnyń úiine bardyq. Apamyzdyń izi, úni, kúii, estelikteri qalǵan shańyraǵyna bardym. Aldaǵy ýaqytta apamyz úshin qadirli bolǵan, 15 jyl turǵan úii týraly kelinimen bolǵan suhbatty, áserli videolardy kóresizder", – dep jazdy prodiýser.
Maraldyń aitýynsha, Roza Baǵlanova eshqashan bireýdiń syrtynan sóz sóilep, ósek aitpaǵan. Adamdardy alalamai, ainalasyndaǵylarǵa árdaiym qurmetpen qaraǵan.
Ánshi nemerelerine erekshe meiirim tógip, olardyń erkin ósýine múmkindik bergen. Tipti balalar jatyn bólmesin astan-kesten etse de, oǵan renjimei, nemerelerin eń úlken bailyǵy sanaǵan.
"Ol kisi jel sóz, ósek áńgime aitpaityn. Múlde! Bireýdi jamandaý, bireýdiń syrtynan sóz aitý degendi bilmeitin. Qara basyn kúittep, óz jaǵdaiyn ǵana jasap, bólmesin qulyptap alyp otyrmaityn. Nemereleri astan-kesteńin shyǵaratyn jatyn bólmesin. "Meniń bailyǵym osylar" dep, nemerelerine az ǵana jylda ǵumyrlyq mahabbatyn tógip ketti", – dep eske aldy kelini.
Joqshylyq kórgendikten, eshteńeni ysyrap etpeitin
Maral enesiniń bala kúninde turmystyń qiyndyǵyn kórgenin de aitty. Sondyqtan ánshi as-aýqatty qadirlep, dastarqandaǵy nannyń usaǵyna deiin ysyrap etpeýge tyrysqan.
"Ol kisi joqshylyq kórip ósti. Eshteńeni qor qylmaityn. Nannyń usaǵyna deiin qadirlep otyratyn. "Mynany jemeimin, ishpeimin" dep tákapparlyq tanytpaityn. Qýyrdaqty jaqsy kóretin", – dedi ol.
Kelininiń sózinshe, Roza Baǵlanova adamdardyń syrtqy kelbeti men áleýmettik jaǵdaiyna emes, tárbiesi men ishki mádenietine mán bergen. Ásirese, Maraldyń ákesin erekshe qurmettep, onyń mádeniettiligin únemi úlgi etip otyrǵan. Óner iesi kelinine as ázirleýdiń de qyr-syryn úiretken. Maral áli kúnge deiin enesinen úirengen baýyrsaqtyń retseptin qoldanatynyn jetkizdi.
Ulymen renjissem, jarty saǵattan keiin sóilesetin
Maral enesiniń otbasyndaǵy kelispeýshilikterdi sabyrmen sheshýge tyrysqanyn da eske aldy. Onyń aitýynsha, joldasymen renjisip qalyp, enesine shaǵymdanǵan sátterde Roza Baǵlanova birden aralaspai, aldymen sabyrǵa kelýge keńes bergen.
"Ulymen kelispei qalyp, aryz aita bastasam, jai ǵana qolyn kúndi kólegeilegendei kóterip: "Túsh, janym, jarty saǵattan soń sóileseiik" deitin. Rasynda, jarty saǵattan soń áńgimemiz basqasha órbitin. Danalyǵy ǵoi", – dedi kelini.
Sondai-aq Maral áigili ánshiniń ómiriniń sońyna deiin ózine kútim jasaýdy umytpaǵanyn aitty. Roza Baǵlanova shashyn rettep, sándenip, súiikti átirin seppei bólmesinen shyqpaǵan. Ásirese, nemereleriniń aldynda árdaiym jinaqy ári ádemi kórinýge tyrysqan.
Kelin bolyp túsken kúni armandarymdy shetke ysyryp qoidym
Maral Roza Baǵlanovanyń shańyraǵyna kelin bolyp túsken kezdegi sezimin de bólisti. Onyń sózinshe, áigili adamnyń otbasyna kelin ataný úlken jaýapkershilik júktegen.
"Men osy shańyraqqa kelin bop túsken kúni-aq armandarymdy buryshqa aparyp "túiip tastadym". Bar oiym: "Eldiń adamynyń kelinimin, jalǵyz uldyń jarymyn. Osy kisi erkin júrsin, osy kisiniń júzi jaryq bolsyn!" dedim", – dep eske aldy ol.
Kelininiń aitýynsha, Roza Baǵlanovanyń boiyndaǵy eń erekshe qasietterdiń biri – júzine árdaiym kúlki úiirilip turatyny.
"Kúlimsirep júretin. Mamamnyń ereksheligi, berekesi, sulýlyǵy da sol kúlkisi edi", – dedi Maral.
Prodiýser Áliia Qudaibergenova aldaǵy ýaqytta Roza Baǵlanovanyń turǵan úii, jeke zattary men otbasylyq estelikterine arnalǵan beinematerialdardy jariialaýdy josparlap otyrǵanyn jetkizdi.
Roza Baǵlanova kim?
Roza Tájibaiqyzy Baǵlanova – qazaqtyń áigili ánshisi, Qazaqstan men KSRO halyq ártisi, Halyq qaharmany. Ol 1922 jyly 1 qańtarda Qyzylorda oblysynyń Qazaly qalasynda dúniege kelgen.
Óner jolyn 1941 jyly Tashkent filarmoniiasynyń án-bi ansamblinde bastaǵan. Ekinshi dúniejúzilik soǵys kezinde maidan dalasynda kontsert berip, jaýyngerlerdiń rýhyn kótergen. 1945 jyly 9 mamyrda Berlinde ótken Jeńis kontsertine qatysqan.
Keiin Abai atyndaǵy Qazaq opera jáne balet teatrynda, Qazaq memlekettik filarmoniiasynda jáne "Qazaqkontsert" birlestiginde qyzmet atqarǵan.
Onyń oryndaýyndaǵy "Ah, Samara, gorodok" jáne "Kesteli oramal" ánderi halyq arasynda keńinen tanyldy.
Roza Baǵlanova 1955 jyly Qazaqstannyń, 1967 jyly KSRO-nyń halyq ártisi atanyp, 1996 jyly "Halyq qaharmany" ataǵyn aldy.
Aty ańyzǵa ainalǵan ánshi 2011 jyly 8 aqpanda Almaty qalasynda 89 jasynda dúnieden ótti
