Павлодар облысында мас күйде жол апатын жасаған әйел жалған жүктілік анықтамасын пайдаланып, жазадан құтылмақ болған. Алайда оның әрекеті прокуратура тексерісі барысында әшкере болды, деп хабарлайды ult.kz.
Ақсу қаласының прокуратурасы әкімшілік құқық бұзушылық туралы істі қарау кезінде ұсынылған медициналық анықтаманың жалған екенін анықтады.
Тексеру нәтижесінде әйелдің жүргізуші куәлігінсіз көлік жүргізіп, алкогольдік масаң күйде жол-көлік оқиғасына себепкер болғаны белгілі болды. Бұған дейін сотқа оның жүкті екені туралы анықтама ұсынылып, осы негізде әкімшілік қамау айыппұлмен ауыстырылған.
Алайда прокуратура жүргізген тексеріс құжаттың жалған екенін көрсетті.
Аталған дерек бойынша Қылмыстық кодекстің 416-бабы бойынша сотқа дейінгі тергеп-тексеру басталды. Сонымен қатар бұл іске қатысы бар полиция қызметкерлерінің әрекетіне де құқықтық баға беріліп жатыр.
Прокуратура құқық бұзушылықтың саралануы мен жаза түрін қайта қарау туралы апелляциялық өтінішхат енгізді. Нәтижесінде облыстық соттың апелляциялық алқасы әйелді 20 тәулікке әкімшілік қамауға алу туралы шешім шығарды.
