Astanada sottalǵan bloger Erbolat Janábilov pen onyń jubaiy Elmira Tólegenova raqymshylyqqa ilikpeidi. Bul týraly Ishki ister ministriniń orynbasary Sanjar Ádilov málimdedi, dep habarlaidy ult.kz.
Erli-zaiypty aldyn ala sóz bailasyp, qylmystyq jolmen alynǵan qarajatty zańdastyrdy degen aiyppen sottalǵan. Sot úkimi boiynsha Erbolat Janábilov 2 jylǵa shartty túrde bas bostandyǵynan aiyrylsa, Elmira Tólegenova 2 jylǵa bas bostandyǵynan aiyrý jazasyna kesilgen.
Ministrlik ókiliniń aitýynsha, raqymshylyq qoldanylýy úshin keltirilgen zalal tolyq ótelýi qajet. Alaida bul is boiynsha zalal ótelmegen.
«Olar aýyrlyǵy ortasha qylmys jasaǵan. Biraq zalal ótelmegendikten, raqymshylyq sharasy qoldanylmaidy», — dedi Sanjar Ádilov Májilistegi brifingte.
Aita keteiik, Elmira Tólegenovanyń jazasyn óteýi úsh balasynyń bolýyna bailanysty keiinge shegerilgen.
