Қостанай облысындағы әйгілі «Қара бүркіт» колониясында да «Соңғы қоңырау» соғылды, деп хабарлайды ult.kz.
Облыстық Қылмыстық-атқару жүйесі департаментінің мәліметінше, Жітіқара қаласындағы №39 қатаң режимдегі мекемеде мектеп бағдарламасын аяқтаған сотталғандарға арнайы шара ұйымдастырылған.
Ресми ақпаратқа сәйкес, білім алғандар — өмір бойына сотталғандар емес, мекеменің шаруашылық жұмыстарына тартылған азаматтар. Олар асхана, тазалық және ішкі шаруашылыққа жауап беретін топ құрамында жазасын өтеп жүр.
Мекемеде өткен шарада сотталғандар гитарамен ән айтып, бір-біріне ізгі тілектерін арнаған. Ұйымдастырушылардың айтуынша, кеш жылы атмосферада өткен.
Сондай-ақ түлектерге жаңа мақсат қойып, өмірге басқа көзқараспен қарауға байланысты ақыл-кеңестер айтылған.
Айта кетейік, «Қара бүркіт» колониясы Қазақстандағы ең қатаң режимдегі абақтылардың бірі саналады. Мұнда аса ауыр қылмыс жасағандар жазасын өтейді.
