Мәскеудегі әйгілі Троекуров зиратынан Қырғызстанның тұңғыш президенті Асқар Ақаевтың ұлы, сондай-ақ Қазақстанның экс-президенті Нұрсұлтан Назарбаевтың кенже қызы Әлия Назарбаеваның бұрынғы жұбайы Айдар Ақаевтың қабірі табылды, деп хабарлайды ult.kz.
Бұл туралы блогер Наиль Валиев әлеуметтік желідегі парақшасында хабарлап, Айдар Ақаевқа қойылған ескерткіштің видеосын жариялады. Желіде тараған кадрларда құлпытас ұлттық нақыштағы бесік пішінінде жасалғаны көрінеді. Ерекше сәулеттік шешім көпшіліктің назарын аударып, әлеуметтік желілерде қызу талқылана бастады.
Айдар Ақаев Қырғызстанда саясатпен айналысып, ел парламентінің депутаты қызметін атқарған. Алайда 2005 жылғы «Қызғалдақ революциясынан» кейін Ақаевтар отбасы биліктен кетіп, Айдар Ақаев Ресейге қоныс аударған. Кейін Қырғызстан билігі оған бірқатар қылмыстық істер бойынша айып тағып, іздеу жариялағанымен, ол ұзақ жыл бойы Мәскеуде тұрған.
Айдар Ақаев 2020 жылдың 5 ақпанында Мәскеуде 43 жасында жүрек талмасынан қайтыс болды. Сол кезде оның қазасы туралы ақпаратты отбасы мүшелері растаған еді.
Айта кетейік, Айдар Ақаев Қазақстанның бұрынғы президенті Нұрсұлтан Назарбаевтың қызы Әлия Назарбаевамен некеде болған. Кейін олардың некесі бұзылып, әрқайсысы өз өмір жолын жалғастырды.
Қазір әлеуметтік желілерде блогер жариялаған бейне кеңінен тарап, қолданушылар ерекше ескерткіштің мәні мен Айдар Ақаевтың өмір жолын қызу талқылап жатыр.
