Máskeýdegi áigili Troekýrov ziratynan Qyrǵyzstannyń tuńǵysh prezidenti Asqar Aqaevtyń uly, sondai-aq Qazaqstannyń eks-prezidenti Nursultan Nazarbaevtyń kenje qyzy Áliia Nazarbaevanyń burynǵy jubaiy Aidar Aqaevtyń qabiri tabyldy, dep habarlaidy ult.kz.
Bul týraly bloger Nail Valiev áleýmettik jelidegi paraqshasynda habarlap, Aidar Aqaevqa qoiylǵan eskertkishtiń videosyn jariialady. Jelide taraǵan kadrlarda qulpytas ulttyq naqyshtaǵy besik pishininde jasalǵany kórinedi. Erekshe sáýlettik sheshim kópshiliktiń nazaryn aýdaryp, áleýmettik jelilerde qyzý talqylana bastady.
Aidar Aqaev Qyrǵyzstanda saiasatpen ainalysyp, el parlamentiniń depýtaty qyzmetin atqarǵan. Alaida 2005 jylǵy «Qyzǵaldaq revoliýtsiiasynan» keiin Aqaevtar otbasy bilikten ketip, Aidar Aqaev Reseige qonys aýdarǵan. Keiin Qyrǵyzstan biligi oǵan birqatar qylmystyq ister boiynsha aiyp taǵyp, izdeý jariialaǵanymen, ol uzaq jyl boiy Máskeýde turǵan.
Aidar Aqaev 2020 jyldyń 5 aqpanynda Máskeýde 43 jasynda júrek talmasynan qaitys boldy. Sol kezde onyń qazasy týraly aqparatty otbasy músheleri rastaǵan edi.
Aita keteiik, Aidar Aqaev Qazaqstannyń burynǵy prezidenti Nursultan Nazarbaevtyń qyzy Áliia Nazarbaevamen nekede bolǵan. Keiin olardyń nekesi buzylyp, árqaisysy óz ómir jolyn jalǵastyrdy.
Qazir áleýmettik jelilerde bloger jariialaǵan beine keńinen tarap, qoldanýshylar erekshe eskertkishtiń máni men Aidar Aqaevtyń ómir jolyn qyzý talqylap jatyr.
