«Орда» тобында туған ағайындылар ән айтқанын білесіз бе? Ал екі бөлек топта танылған Батыр Байназаров пен Асқар Ахмет бір әнге бірге қолтаңба қалдырған. Мақпал Жүнісованың жиені де ән айтып, шәкірт тәрбиелеген, деп хабарлайды ult.kz.
Мақпал Жүнісова мен Арманай Мұхамедиярова
Әнші Арманай Мұхамедиярова — Мақпал Жүнісованың туған әпкесінің қызы. Қазақстанның халық әртісі бұл туыстық жайын 2024 жылы отбасындағы қуанышпен бөліскенде өзі айтқан. “Туған әпкемнің қызы Арманай аман-есен босанды”, — деп жазған әнші. Сол жылы Арманай үшінші перзентін дүниеге әкелген.

Арманайдың орындауындағы “Сезім сыңғыры” әнін «Хабар» арнасының «Кел, шырқайық» бағдарламасынан тыңдауға болады. Ол ән мәтінін жазуға да атсалысқан. Мәселен, The Jigits тобының “Сыныптастар” әнінің сөзін жазғандардың қатарында оның есімі бар. Massaget.kz-тің 2024 жылғы мәліметінше, Арманай Қазақ ұлттық өнер университетінде эстрадалық вокалдан сабақ берген.
Батыр Байназаров пен Асқар Ахмет
Батыр Байназаров пен Асқар Ахметтің тегі бөлек болғанымен, екеуі — туған ағайынды. Батыр «Rin’Go» тобы құрылған кезден бастап құрамында өнер көрсеткен. Ал Асқар продюсер Алуа Қонарова құрған «Renzo» тобына қосылып, әншілікпен қатар ән мәтінін жазған.

Екі топта ән айтқан ағайындыларды «Renzo»-ның шығармашылығы тоғыстырды. Топтың “Болшы жанымда” әнінің әуенін Батыр, сөзін Асқар жазған. Ал “Бақытты болшы” әнінің сөзі мен әуенін Асқардың өзі жазса, бейнебаянына Батыр режиссерлік еткен.
Дастан мен Рүстем Оразбековтер
Дастан Оразбековті үлкен сахнаға алғаш жетелеген адамның бірі — туған ағасы Рүстем. Дастан «Жарқын жүздесу» бағдарламасында бұл оқиғаны еске алған. Рүстем «Керемет» театрына актер болып қабылданған кезде, Дастан әлі мектепте оқып жүрген. Театрға әнші керек екенін естіген ағасы інісін тыңдалымға ертіп барған.

Дастан сабақтан кейін театрға барып, ән айтып берген. Өзінің айтуынша, сол күні бірден қабылданған. Кейін театрда «Орда» тобы құрылып, ағалы-інілі Оразбековтер бір ұжымда өнер көрсетті. Уақыт өте Рүстем топтан кетті, ал Дастан «Орда» құрамында ән айтуды жалғастырды.
Алтынай мен Талғат Жорабаевтар
Алтынай Жорабаева інісі Талғаттың әншілік жолға түсуіне көмектескен. Кейін екеуі дуэт айтып, бірге концерт қойған. Талғат ERNUR.KZ-ке берген сұхбатында әпкесінің жанында ән айтуды мәртебе санайтынын және оның қолдауына жиі арқа сүйейтінін айтқан.

Сұхбатта Талғаттан әпкесінің көлеңкесінде қалып қоямын деп ойламай ма деп сұраған. “Мен үшін оның көлеңкесінде қалып қою ұят емес”, — деп жауап берген әнші. Ол Алтынайды өнерде жол көрсеткен әпкесі деп біледі. Талғаттың айтуынша, кейде босаңсып кеткенде де оны қайта қамшылайтын — Алтынай.