«Orda» tobynda týǵan aǵaiyndylar án aitqanyn bilesiz be? Al eki bólek topta tanylǵan Batyr Bainazarov pen Asqar Ahmet bir ánge birge qoltańba qaldyrǵan. Maqpal Júnisovanyń jieni de án aityp, shákirt tárbielegen, dep habarlaidy ult.kz.
Maqpal Júnisova men Armanai Muhamediiarova
Ánshi Armanai Muhamediiarova — Maqpal Júnisovanyń týǵan ápkesiniń qyzy. Qazaqstannyń halyq ártisi bul týystyq jaiyn 2024 jyly otbasyndaǵy qýanyshpen bóliskende ózi aitqan. “Týǵan ápkemniń qyzy Armanai aman-esen bosandy”, — dep jazǵan ánshi. Sol jyly Armanai úshinshi perzentin dúniege ákelgen.

Armanaidyń oryndaýyndaǵy “Sezim syńǵyry” ánin «Habar» arnasynyń «Kel, shyrqaiyq» baǵdarlamasynan tyńdaýǵa bolady. Ol án mátinin jazýǵa da atsalysqan. Máselen, The Jigits tobynyń “Synyptastar” ániniń sózin jazǵandardyń qatarynda onyń esimi bar. Massaget.kz-tiń 2024 jylǵy málimetinshe, Armanai Qazaq ulttyq óner ýniversitetinde estradalyq vokaldan sabaq bergen.
Batyr Bainazarov pen Asqar Ahmet
Batyr Bainazarov pen Asqar Ahmettiń tegi bólek bolǵanymen, ekeýi — týǵan aǵaiyndy. Batyr «Rin’Go» toby qurylǵan kezden bastap quramynda óner kórsetken. Al Asqar prodiýser Alýa Qonarova qurǵan «Renzo» tobyna qosylyp, ánshilikpen qatar án mátinin jazǵan.

Eki topta án aitqan aǵaiyndylardy «Renzo»-nyń shyǵarmashylyǵy toǵystyrdy. Toptyń “Bolshy janymda” ániniń áýenin Batyr, sózin Asqar jazǵan. Al “Baqytty bolshy” ániniń sózi men áýenin Asqardyń ózi jazsa, beinebaianyna Batyr rejisserlik etken.
Dastan men Rústem Orazbekovter
Dastan Orazbekovti úlken sahnaǵa alǵash jetelegen adamnyń biri — týǵan aǵasy Rústem. Dastan «Jarqyn júzdesý» baǵdarlamasynda bul oqiǵany eske alǵan. Rústem «Keremet» teatryna akter bolyp qabyldanǵan kezde, Dastan áli mektepte oqyp júrgen. Teatrǵa ánshi kerek ekenin estigen aǵasy inisin tyńdalymǵa ertip barǵan.

Dastan sabaqtan keiin teatrǵa baryp, án aityp bergen. Óziniń aitýynsha, sol kúni birden qabyldanǵan. Keiin teatrda «Orda» toby qurylyp, aǵaly-inili Orazbekovter bir ujymda óner kórsetti. Ýaqyt óte Rústem toptan ketti, al Dastan «Orda» quramynda án aitýdy jalǵastyrdy.
Altynai men Talǵat Jorabaevtar
Altynai Jorabaeva inisi Talǵattyń ánshilik jolǵa túsýine kómektesken. Keiin ekeýi dýet aityp, birge kontsert qoiǵan. Talǵat ERNUR.KZ-ke bergen suhbatynda ápkesiniń janynda án aitýdy mártebe sanaitynyn jáne onyń qoldaýyna jii arqa súieitinin aitqan.

Suhbatta Talǵattan ápkesiniń kóleńkesinde qalyp qoiamyn dep oilamai ma dep suraǵan. “Men úshin onyń kóleńkesinde qalyp qoiý uiat emes”, — dep jaýap bergen ánshi. Ol Altynaidy ónerde jol kórsetken ápkesi dep biledi. Talǵattyń aitýynsha, keide bosańsyp ketkende de ony qaita qamshylaityn — Altynai.