Keide ánshini halyqqa tanytqan shyǵarmanyń ózi keiin úlken daýǵa sebep bolady. Biri prodiýserimen kelise almai, burynǵy ánderin oryndaý múmkindiginen aiyrylsa, endi biri jyldar boiy shyrqaǵan hitimen qoshtasýǵa májbúr bolǵan. Tipti óz daýsymen tanylǵan ándi oryndaýǵa avtorynyń ruqsaty qajet ekenin keiin bilgender de bar. Ult.kz tilshisi ánderiniń taǵdyryna qatysty qiyndyqqa tap bolǵan bes óner iesiniń suhbattaryn jinaqtady.
1. Erke Esmahan "Allo" áninen qalai aiyryldy?

Tanymal ánshi Erke Esmahannyń shyǵarmashylyq jolynda "Allo" áni erekshe oryn alǵanymen, keiin ol týyndyny oryndaý múmkindiginen aiyrylǵan.
Bul týraly óner iesi 2017 jyly bergen suhbatynda ashyq aitqan. Ánshi "Allo" shyǵarmasynyń óz repertýarynan alynǵanyn málimdegen. Onyń aitýynsha, ánniń avtory týyndyny basqa oryndaýshylarǵa satyp jibergen. Sonyń saldarynan Erke buryn ózi oryndap júrgen ándi endi aita almaitynyn jetkizgen. Bul jaǵdai oǵan ońai timegeni suhbatynan baiqalady.
Óner iesi ándi ózge oryndaýshylardyń shyrqap júrgenine de toqtalǵan. Ásirese Tóreǵali Tóreáliniń shyǵarmany basqa ánshi qyzdarmen oryndap júrgenin aitqan. Osylaisha kezinde tyńdarmanǵa óz daýysymen jetkizgen týyndy onyń repertýarynan shyǵyp qalǵan.
2. Sanda burynǵy ánderin oryndasa, zań aldynda jaýap berýi múmkin ekenin aitty

Kezinde erekshe stilimen tanylǵan ánshi Sanda prodiýser Erik Tastembekovpen jumysyn toqtatqan soń shyǵarmashylyq ómirinde úlken ózgerister bolǵanyn málimdedi.
Óner iesi Stan.kz tilshisine bergen suhbatynda burynǵy prodiýserimen jeti jylǵa kelisimshart jasaǵanyn, biraq úsh jyldan keiin eki jaqqa ketkenderin aitqan. Onyń sózinshe, buǵan minezderi men shyǵarmashylyq kózqarastarynyń sáikes kelmeýi sebep bolǵan. Alaida kelisimshartty toqtatý ánshige ońaiǵa soqpaǵan. Sanda burynǵy prodiýserimen birge jazǵan ánderin endi oryndai almaitynyn jetkizdi. Sebebi shyǵarmalardyń avtorlyq quqyqtary Erik Tastembekovtiń qolynda bolǵan. Ánshi ol týyndylardy ruqsatsyz oryndasa, zań aldynda jaýapqa tartylýy múmkin ekenin aitqan. Al Erik Tastembekov óz kezeginde kelisimshart merziminen buryn buzylǵan jaǵdaida jazylǵan ánder men beinebaiandar prodiýserdiń ieliginde qalatynyn málimdegen.
Sanda bul jaǵdaidan keiin burynǵy repertýaryna súienbei, jańa ánder jazýǵa kirisken. Ol endigi shyǵarmashylyǵynda óziniń talǵamyna sai ánderdi oryndap, vokaldyq múmkindigin tolyq kórsetkisi keletinin jetkizdi.
3. Turar Ydyrysov burynǵy prodiýserimen jumysyn toqtatqan soń ánderin paidalana almaǵan

2RAR esimimen tanylǵan Turar Ydyrysov ta prodiýserimen eki jaqqa ketkennen keiin burynǵy ánderin paidalana almai qalǵanyn aitqan.
Óner iesi 2023 jyly Ernur.kz basylymyna bergen suhbatynda bul jaǵdaidyń mán-jaiyn túsindirdi. Onyń aitýynsha, prodiýser Naziramen aralarynda kelispeýshilik týyndaǵan. Sonyń saldarynan ekeýi shyǵarmashylyq bailanysyn toqtatýǵa sheshim qabyldaǵan. Buǵan deiin taraptar arasynda arnaiy kelisimshart bolǵanymen, jumys belgilengen merzimge deiin jalǵaspaǵan.
Keiin ánshiniń burynǵy shyǵarmalary internettegi paraqshalardan joǵala bastaǵan. Turar sol kezde bul jaǵdaiǵa qatysty barlyq másele áli sheshilmegenin jetkizgen. Ánshi burynǵy prodiýserimen jumys istegen ýaqytta shyqqan týyndylardy paidalana almaitynyn da jasyrmady. Sondyqtan ol jeke shyǵarmashylyǵyn qaita bastap, qysqa merzimde jańa ánder shyǵarýǵa kirisken. Turar Ydyrysov osy ózgeristerden keiin jeke albom daiyndap, kontsert ótkizýdi josparlaǵanyn aitqan.
4. Nurlan Ónerbaev 37 jyl aitqan "Anashym" ánimen qoshtasty

Qazaqstannyń eńbek sińirgen qairatkeri Nurlan Ónerbaev kópshilikke keńinen tanylǵan "Anashym" ánin endi oryndamaitynyn málimdegen.
Ánshi bul sheshiminiń sebebin Ontustik TV arnasyndaǵy "Tań nury" baǵdarlamasynda túsindirdi. Onyń aitýynsha, shyǵarmanyń avtory Marat Omarov ándi ózi oryndaǵysy keletinin bildirgen. Tipti 2018 jyly Astanada ótetin kontsertiniń aldynda kompozitor ándi aitpaýyn suraǵan. Nurlan Ónerbaev sol kezde avtordyń ótinishine kelisim bergenin jetkizdi. Alaida kontsertterde tyńdarmandar súiikti ánin qaita-qaita surai bergen. Ánshi keide kórermenmen birge shyǵarmanyń qaiyrmasyn shyrqaitynyn aitqan.
Aqyry 2023 jyly Almatydaǵy kontsertinde 37 jyl boiy oryndaǵan týyndysymen resmi túrde qoshtasqan. Al Marat Omarov keiin bergen suhbatynda ánshige zań júzinde tyiym salmaǵanyn, negizgi renish avtorlardyń esimderi atalmaitynyna bailanysty ekenin túsindirdi. Osylaisha bir ánmen uzaq jyl boiy tanylǵan óner ieleri shyǵarmanyń oryndalýyna qatysty ártúrli ustanym bildirgen.
5. BAYANSULU bes ániniń taǵdyryna bailanysty daýǵa tap boldy

"Aýa raiy" ánimen tanylǵan BAYANSULU da shyǵarmalarynyń avtorlyq quqyǵyna qatysty kelispeýshilikke tap bolǵan.
2026 jyly ánshi men kompozitor Qýat Ábilov arasyndaǵy daý áleýmettik jelide jariia boldy. Kompozitor oryndaýshyǵa bes án jazyp bergenin aityp, olardyń qatarynda "Aýa raiy", "Umytsam da", "Kútemin", "Sondaiym bar endi" jáne "La La" shyǵarmalaryn atady. Onyń málimdeýinshe, bul týyndylar úshin kelisilgen qalamaqy tolyq tólenbegen. Sondyqtan ol ánderdi mýzykalyq platformalardan alyp tastap, oryndaýǵa ruqsat bermeitinin jetkizdi.
Alaida BAYANSULU kompozitordyń bul málimdemesimen kelispeitinin ashyq aitty. Ánshiniń sózinshe, "Umytsam da" shyǵarmasyn 2024 jyly aqysyn tólep satyp alǵan, biraq sol kezde jazbasha kelisimshart jasalmaǵan. Ol keiin qalamaqy mólsheri bastapqy kelisilgen somadan úsh ese ósip ketkenin málimdedi. Sondai-aq kompozitormen belgili bir somaǵa keliskenderin, alaida kelisimshartqa qol qoiý kezinde jaǵdai qaita ózgergenin jetkizdi. Eki tarap bir-biriniń ýájin joqqa shyǵarǵandyqtan, bes ánniń oryndalýyna qatysty másele ashyq daýǵa ainaldy.
Ándi tanymal etken adam onyń iesi bola ma?
Qazaq estradasyndaǵy bul oqiǵalar ánshi men avtordyń arasyndaǵy kelisimniń qanshalyqty mańyzdy ekenin kórsetedi. Kóp jaǵdaida tyńdarman týyndyny alǵash oryndaǵan nemese elge tanytqan adamnyń áni dep qabyldaidy. Alaida shyǵarmanyń mýzykasy men sózin jazǵan avtorlardyń quqyqtary bólek qorǵalady. Sondyqtan ánshiniń uzaq jyl boiy oryndaǵan týyndysyn keiin de erkin paidalana alýy jasalǵan kelisimniń mazmunyna bailanysty.
Biri súiikti ánimen qoshtasyp, endi biri jańa repertýar jasaqtaýǵa májbúr bolǵan. Al keibir óner ieleriniń ánge qatysty kelispeýshiligi áli de talqylanyp keledi.