Ánshi Tóreǵali Tóreáliniń qaryndasy áleýmettik jelidegi jazbasynan keiin oqyrmandardyń synyna ushyrady. 23 jasta ekenin jáne úsh balasy baryn aitqan ol joǵary bilim alýdan góri otbasyn qurýdy tańdaǵanyn, diplomsyz-aq kásibi men tabysy bar ekenin málimdedi, dep habarlaidy ult.kz.
Instagram paraqshasynda Dina Tóreáli (tattti_kyz) bilim alý eshqashan kesh emes ekenin, alaida diplom adamnyń jetistigin anyqtamaitynyn jazǵan.
«Oqýdy emes, otbasy bolýdy tańdadym sol sátte! Oqý, bilim alý eshqashan da kesh emes jáne odan qashpaimyn. Biraq sender oilaǵan bir qaǵaz diplom eshteńeni sheshpeidi. Potentsialyń joq bolsa, 10 diplomyń bolsa da kómektespeidi! Diplomym joq – biznesim bar, diplomym joq – tabysym bar», – dep jazdy ol.
Sondai-aq kúndelikti damýǵa kóńil bólip júrgenin jetkizdi.
Onyń bul pikiri jeli qoldanýshylarynyń arasynda qyzý talqylandy. Keibir oqyrman diplomnyń mańyzyn tómendetkenimen kelispei, túrli mamandyq ieleriniń eńbegin mysalǵa keltirdi.
«Eger bir qaǵaz diplom eshteńe sheshpese, ne úshin aýyrǵanda diplomsyz-aq emdei alatyn baqsy-balgerge emes, toǵyz jylyn oqýǵa arnaǵan dárigerge barasyń? Al saǵan árip tanytyp, oqý men jazýdy úiretken muǵalim she? Onyń da eńbegi bir qaǵazben ólshene me? Basyńa is túsip, quqyǵyń taptalǵanda diplomy joq bireýdi emes, zańdy biletin mamandy izdeisiń ǵoi», – dep jazdy jeli qoldanýshylarynyń biri.
Taǵy bir oqyrman jýrnalistika men óner salasynda bilim alǵan mamandardyń eńbegi men memlekettik qarjynyń jumsalýyn alǵa tartyp, diplomsyz-aq tabys tabatynyn aitýdyń durys emestigin jetkizgen.

Bir qyzyǵy, Tátti qyz keiingi storisinde «Habar» telearnasynan júrgizýshilikke usynys túskenin de habarlaǵan. Ol bul usynysqa qatysty ázirge qosymsha málimet bermegen.
