Қазақ өнерінде ата-анасының ізін басып, сахна мен шығармашылықты таңдағандар аз емес. Бірі әншілік дәстүрді жалғастырса, енді бірі актерлікке немесе дирижерлікке бет бұрған. Ult.kz өнерлі отбасынан шыққан алты тұлға туралы мәлімет жинақтады.
Димаш Құдайберген
Димаш Құдайбергеннің әкесі Қанат Айтбаев пен анасы Светлана Айтбаева – әншілер. Өнерлі отбасында өскен Димаш та музыкаға ерте араласып, кейін халықаралық сахнаға шықты. Әке-шешесі әншілік жолды таңдаса, ұлы сол дәстүрді жалғастырып, қазақ әнін шетелдік тыңдарманға танытып жүр.
Әли Оқапов
Әли Оқапов – Қазақстанның халық әртісі Роза Рымбаева мен дирижер Тасқын Оқаповтың ұлы. Ол әншілікпен қатар продюсерлікпен де айналысады. Әли анасының жолын қуып, эстрадаға келгенімен, өз репертуарын қалыптастырып, жеке орындаушы ретінде танылды.
Мәди Рымбаев
Роза Рымбаева мен Тасқын Оқаповтың кенже ұлы Мәди де әншілікті таңдаған. Ол жеке әндер орындап, анасы және ағасымен бірге сахнаға шығып келеді. 2025 жылы Роза Рымбаева екі ұлымен бірлескен ән мен бейнебаян ұсынды. Осылайша, бір шаңырақтың үш өнерпазы ортақ шығармашылық жұмыста бас қосты.
Айжұлдыз Адайбекова
Айжұлдыз Адайбекова – әнші әрі актриса Жанар Айжанованың қызы. Анасы секілді ол да актерлік өнерге бет бұрып, киноға түсіп, театр сахнасында өнер көрсеткен. Айжұлдыздың айтуынша, анасымен бірге бір фильмге түскен кездері де болған. Көрермен оны «Жыным сол» фильміндегі рөлінен де таниды.
Дінзухра Тілендиева
Дінзухра Тілендиева – әйгілі композитор, күйші әрі дирижер Нұрғиса Тілендиевтің қызы. Ол әкесінің жолын жалғап, дирижер мамандығын таңдады. Дінзухра «Отырар сазы» оркестрімен бірге ұлттық музыканы насихаттап, Нұрғиса Тілендиевтің шығармаларын орындап келеді. Әкесінің 100 жылдығына арналған концерттерде де оркестрге дирижерлік етті.
Байғали Серкебаев
Байғали Серкебаев – әйгілі опера әншісі Ермек Серкебаевтың ұлы. Әкесі опера сахнасында танылса, Байғали эстрадалық музыкаға бет бұрды. Ол – A’Studio тобының негізін қалаушы, композитор, клавишші әрі продюсер. Топтың көптеген әні мен музыкалық өңдеуінің авторы ретінде белгілі.
Әкесі Ермек Серкебаев оны классикалық музыкант ретінде көргісі келген. Бірақ Байғали эстраданы таңдаған. WEproject-ке берген сұхбатында әкесі оның таңдауын A’Studio тобына 15 жыл толғанда ғана мойындағанын айтқан. Концертіне келіп, ұлының шығармашылығын үлкен өнер деп бағалаған.
