Бірі тұрмысқа шыққан соң ән айтуды тоқтатты, енді бірі күйеуінің өтінішімен гастрольден бас тартты. Ал кейбір әншілердің өнерден уақытша кетуіне отбасылық жағдайлар мен өміріндегі ауыр кезеңдер себеп болған. Көпшілік алдында жарқырап жүрген жұлдыздардың сахна сыртындағы өмірі қандай болды? Ult.kz өнер мен отбасының арасында таңдау жасауға тура келген қазақстандық әншілердің оқиғаларын жинақтады.
Қазақ эстрадасында тұрмыс құрғаннан кейін шығармашылығын уақытша тоқтатқан әншілер аз емес. Олардың кейбірі отбасына көбірек көңіл бөлуді өзі таңдаса, енді бірі жарының талаптарына байланысты сахнадан алыстағанын мойындаған. Мұндай шешімдер біреулердің шығармашылық жолына үзіліс әкелсе, басқаларының өмірінде үлкен өзгерістерге себеп болды.
Бір қызығы, көпшілік өнерден алыстаған әншінің барлығын күйеуі сахнаға шығармай отыр деп ойлайды. Алайда өнер иелерінің өз сұхбаттарына үңілсек, әр отбасының оқиғасы әртүрлі. Бірі мұндай әңгімені растаған, енді бірі көпшіліктің болжамын жоққа шығарған.
1. Балжан Бидаш пен Жахан Отарғалиев: "Шығармашылығымды ысырып тастадым"
KeshYOU тобы арқылы танылған Балжан Бидаш тұрмысқа шыққаннан кейін бірнеше жыл сахнадан көрінбей кетті.
Әнші 2020 жылы актер әрі продюсер Жахан Отарғалиевпен шаңырақ көтеріп, шығармашылықтан гөрі отбасылық өміріне басымдық берді. Осы кезеңде ол ән айтудан алыстап, әлеуметтік желідегі блогерлік қызметіне көбірек көңіл бөлді. 2022 жылы оқырмандарының сахнаға қашан оралатыны туралы сұрағына жауап берген Балжан отбасылы болған соң барлық шешімді жалғыз қабылдай алмайтынын жеткізген. Өнер иесі күйеуінің гастрольдік сапарларға жиі шығуын қаламайтынын да жасырмаған. Алайда жұптың некесі ұзаққа созылмай, 2023 жылы ажырасқаны белгілі болды.
Ажырасқаннан кейін Балжан Бидаш Harper's Bazaar Kazakhstan басылымына арнайы сұхбат беріп, үш жылдан астам уақыт шығармашылықтан қол үзгенін айтты. Әншінің сөзінше, ол отбасын сақтап қалу үшін өз қалауын кейінге ысырып, күйеуінің талаптарына бейімделген. Балжан өзіне қойылған шектеулер мен жеке қалауының ескерілмеуі арадағы түсініспеушілікті күшейткенін айтып, некені тоқтату туралы шешімді өзі қабылдағанын мәлімдеді.
Кейін әнші BIDASH есімімен жеке шығармашылығын қайта қолға алып, сахнаға оралды
2. Мәдина Сәдуақасова мен Олжас Смағұлов: "Тойдан кейін мені еш жерден көре алмады"
Қазақ эстрадасының танымал әншісі Мәдина Сәдуақасова 2014 жылы режиссер Олжас Смағұловпен шаңырақ көтерді. Өнер иесі тұрмысқа шыққаннан кейін шығармашылығын бұрынғыдай жалғастыра алмай, біраз уақыт сахнадан алыстаған.
2018 жылы НТК арнасының "Ревю" бағдарламасына берген сұхбатында әнші мұның себебін күйеуінің шешімімен байланыстырды. Оның айтуынша, тойдан кейін бір жылға жуық концерттерге қатысуына, сұхбат беруіне және түсірілімдерге баруына шектеу қойылған. Тіпті шетелге демалуға шығу мүмкіндігі де болмағанын еске алған.
Мәдина жолдасының көпшілік ортада жүруді ұнатпайтынын, екеуінің мінезі бір-біріне ұқсамайтынын да жасырмады. 2023 жылы "Төрлетіңіз" бағдарламасында ол некенің алғашқы жылдарында күйеуінің қатты қызғанғанын айтып, бұл жағдайдың өнеріне әсер еткенін жеткізді. Дегенмен уақыт өте келе Олжас Смағұлов жарының сахнадан қол үзе алмайтынын түсініп, оның шығармашылық жұмысына қолдау көрсете бастаған.
Мәдина 2018 жылы бір жылдың ішінде 23 ән жазып, өнерге белсенді араласқанын НТК тілшілеріне айтқан еді. Осылайша, әнші тұрмыстың алғашқы жылдарындағы шектеулерден кейін сахнаға қайта оралып, шығармашылығын жалғастырды.
3. Айдана Меденова мен Әлішер Нұржанов: Күйеуі тыйым салды деген сөз рас па?
KeshYOU тобының бұрынғы әншісі Айдана Меденова да бірнеше жыл сахнадан алыстап, көпшілікті түрлі болжам жасауға мәжбүр етті. Ол кәсіпкер әрі продюсер Әлішер Нұржановпен отбасын құрғаннан кейін де шығармашылығын жалғастырып, жаңа әндер мен бейнебаяндар шығарған.
Алайда кейін әнші өнерден кететінін жариялап, үш жылға жуық музыкалық жұмыстарына үзіліс жасады. Осы аралықта әлеуметтік желіде оның күйеуі сахнаға шығуына тыйым салғаны және орамал тағуға мәжбүрлегені туралы әңгімелер тарады. Бірақ Айдана 2026 жылдың қаңтарында Gakku TV арнасына берген сұхбатында бұл болжамдардың шындыққа жанаспайтынын айтты.
Әншінің сөзінше, сахнадан кетуіне шығармашылық шаршау, өміріндегі ауыр оқиғалар және отбасылық сынақтар себеп болған. Ол өнерден қол үзу туралы шешім қабылдардан бір жыл бұрын әкесінен айырылғанын және сол кезеңнің өзіне оңай тимегенін жеткізді. Айдананың айтуынша, бұл шешіміне күйеуі Әлішер Нұржановтың өзі де таңғалған.
Кейін "Ревю" бағдарламасында әнші жарының үнемі қолдау көрсететінін және маңызды шешімдерді бірге қабылдайтынын мәлімдеді. Ұзақ үзілістен кейін өнерге қайта оралған Айдана өзінің шығармашылық жолын жалғастыратынын көрсетті.
4. Кәмшат Жолдыбаева мен Ғазрет Қажымұқанұлы: "Отбасылы болғаннан кейін уақыт керек"
KeshYOU тобы арқылы танылған Кәмшат Жолдыбаева жеке шығармашылығында да танымал әнші ретінде көрермен ықыласына бөленді. Кейін ол актер Ғазрет Қажымұқанұлымен отбасын құрып, өнердегі белсенділігін біршама азайтты. Әншінің бұрынғыдай жиі концерттерге шықпай, көпшілік алдына сирек көрінуі әлеуметтік желіде түрлі пікір туғызды. Кейбір оқырмандар Кәмшаттың сахнадан алыстауына күйеуі себеп болды деп болжады.
Бұл мәселе 2026 жылғы наурызда НТК арнасының "Ревю" бағдарламасында актер Ғазрет Қажымұқанұлына тікелей қойылды.
Сұхбат барысында актер отбасылық өмірге бейімделу үшін уақыт қажет болғанын айтып, алғашқы кезеңде жұбайының сахналық образына қатысты ақылдасқандарын жасырмады. Сонымен қатар ол қазір Кәмшаттың сыртқы келбеті мен шығармашылық образына байланысты шешімдерді өзі қабылдайтынын жеткізді. Ғазреттің айтуынша, олардың көпшілік алдына қайта шыға бастағанын көрермен де байқаған.
Осылайша, актер әншінің өнеріне біржола тыйым салғаны туралы пікірді растаған жоқ. Кәмшат Жолдыбаеваның оқиғасы танымал адамның отбасын құрғаннан кейінгі шығармашылық үзілісі жұрт арасында қалай түрлі болжамға ұласатынын көрсетеді.
5. Ұлту Қабаева мен Рамазан Стамғазиев: Он жыл бойы бала тәрбиесіне көңіл бөлген әнші
Қазақтың дәстүрлі ән өнерінде өзіндік орны бар Ұлту Қабаева да отбасы үшін шығармашылығына ұзақ уақыт үзіліс жасаған өнер иелерінің бірі. Ол белгілі әнші Рамазан Стамғазиевпен отбасын құрып, балаларының тәрбиесіне көбірек көңіл бөлген.
2017 жылы "Қалаулым" бағдарламасына берген сұхбатында Ұлту Қабаева он жылға жуық үйде отырып, балалары есейгеннен кейін ғана сахнаға қайта шыққанын айтты. Сол сұхбатта Рамазан Стамғазиев жас шағында гастрольдік сапарларға жиі шығып, кейде үш-төрт айлап үйіне келе алмағанын мойындады. Осындай кезеңдердің бірінде ол жарына басқа мамандық таңдап, балалардың жанында болуды ұсынған.
Алайда Ұлту Қабаева әншіліктен біржола бас тартқысы келмейтінін айтып, күйеуінің ұсынысына келіспеген. Рамазан Стамғазиев те содан кейін жарына мамандығын ауыстыру туралы қайтып сөз қозғамағанын жеткізді. Балалары ержеткен соң Ұлту Қабаева білімін жалғастырып, магистратураны тәмамдап, шығармашылығына қайта ден қойған. Кейін ерлі-зайыпты бірге концерттер өткізіп, дәстүрлі ән өнерін насихаттауды жалғастырды.
Осылайша, Ұлту Қабаева отбасылық міндеттерге байланысты сахнадан ұзақ уақыт алыстағанымен, сүйікті кәсібін түбегейлі тастаған жоқ.
Өнер мен отбасының арасында таңдау жасау әр әншінің өмірінде әртүрлі із қалдырған. Бірі жарының қалауымен сахнадан алыстаса, енді бірі бала тәрбиесіне көңіл бөліп, шығармашылығына уақытша үзіліс жасаған. Ал кейбір өнер иелері мұндай шешімді өз еркімен қабылдағанын айтып, көпшілік арасында тараған қауесеттерді жоққа шығарды. Дегенмен олардың басым бөлігі араға жылдар салып, сүйікті кәсібіне қайта оралды.
Бұл оқиғалар отбасы құрғаннан кейін де шығармашылық жолды жалғастыруға болатынын, алайда ол үшін ерлі-зайыптылардың өзара түсіністігі мен қолдауы маңызды екенін көрсетеді.
