Biri turmysqa shyqqan soń án aitýdy toqtatty, endi biri kúieýiniń ótinishimen gastrolden bas tartty. Al keibir ánshilerdiń ónerden ýaqytsha ketýine otbasylyq jaǵdailar men ómirindegi aýyr kezeńder sebep bolǵan. Kópshilik aldynda jarqyrap júrgen juldyzdardyń sahna syrtyndaǵy ómiri qandai boldy? Ult.kz óner men otbasynyń arasynda tańdaý jasaýǵa týra kelgen qazaqstandyq ánshilerdiń oqiǵalaryn jinaqtady.
Qazaq estradasynda turmys qurǵannan keiin shyǵarmashylyǵyn ýaqytsha toqtatqan ánshiler az emes. Olardyń keibiri otbasyna kóbirek kóńil bólýdi ózi tańdasa, endi biri jarynyń talaptaryna bailanysty sahnadan alystaǵanyn moiyndaǵan. Mundai sheshimder bireýlerdiń shyǵarmashylyq jolyna úzilis ákelse, basqalarynyń ómirinde úlken ózgeristerge sebep boldy.
Bir qyzyǵy, kópshilik ónerden alystaǵan ánshiniń barlyǵyn kúieýi sahnaǵa shyǵarmai otyr dep oilaidy. Alaida óner ieleriniń óz suhbattaryna úńilsek, ár otbasynyń oqiǵasy ártúrli. Biri mundai áńgimeni rastaǵan, endi biri kópshiliktiń boljamyn joqqa shyǵarǵan.
1. Baljan Bidash pen Jahan Otarǵaliev: "Shyǵarmashylyǵymdy ysyryp tastadym"
KeshYOU toby arqyly tanylǵan Baljan Bidash turmysqa shyqqannan keiin birneshe jyl sahnadan kórinbei ketti.
Ánshi 2020 jyly akter ári prodiýser Jahan Otarǵalievpen shańyraq kóterip, shyǵarmashylyqtan góri otbasylyq ómirine basymdyq berdi. Osy kezeńde ol án aitýdan alystap, áleýmettik jelidegi blogerlik qyzmetine kóbirek kóńil bóldi. 2022 jyly oqyrmandarynyń sahnaǵa qashan oralatyny týraly suraǵyna jaýap bergen Baljan otbasyly bolǵan soń barlyq sheshimdi jalǵyz qabyldai almaitynyn jetkizgen. Óner iesi kúieýiniń gastroldik saparlarǵa jii shyǵýyn qalamaitynyn da jasyrmaǵan. Alaida juptyń nekesi uzaqqa sozylmai, 2023 jyly ajyrasqany belgili boldy.
Ajyrasqannan keiin Baljan Bidash Harper's Bazaar Kazakhstan basylymyna arnaiy suhbat berip, úsh jyldan astam ýaqyt shyǵarmashylyqtan qol úzgenin aitty. Ánshiniń sózinshe, ol otbasyn saqtap qalý úshin óz qalaýyn keiinge ysyryp, kúieýiniń talaptaryna beiimdelgen. Baljan ózine qoiylǵan shekteýler men jeke qalaýynyń eskerilmeýi aradaǵy túsinispeýshilikti kúsheitkenin aityp, nekeni toqtatý týraly sheshimdi ózi qabyldaǵanyn málimdedi.
Keiin ánshi BIDASH esimimen jeke shyǵarmashylyǵyn qaita qolǵa alyp, sahnaǵa oraldy
2. Mádina Sádýaqasova men Oljas Smaǵulov: "Toidan keiin meni esh jerden kóre almady"
Qazaq estradasynyń tanymal ánshisi Mádina Sádýaqasova 2014 jyly rejisser Oljas Smaǵulovpen shańyraq kóterdi. Óner iesi turmysqa shyqqannan keiin shyǵarmashylyǵyn burynǵydai jalǵastyra almai, biraz ýaqyt sahnadan alystaǵan.
2018 jyly NTK arnasynyń "Reviý" baǵdarlamasyna bergen suhbatynda ánshi munyń sebebin kúieýiniń sheshimimen bailanystyrdy. Onyń aitýynsha, toidan keiin bir jylǵa jýyq kontsertterge qatysýyna, suhbat berýine jáne túsirilimderge barýyna shekteý qoiylǵan. Tipti shetelge demalýǵa shyǵý múmkindigi de bolmaǵanyn eske alǵan.
Mádina joldasynyń kópshilik ortada júrýdi unatpaitynyn, ekeýiniń minezi bir-birine uqsamaitynyn da jasyrmady. 2023 jyly "Tórletińiz" baǵdarlamasynda ol nekeniń alǵashqy jyldarynda kúieýiniń qatty qyzǵanǵanyn aityp, bul jaǵdaidyń ónerine áser etkenin jetkizdi. Degenmen ýaqyt óte kele Oljas Smaǵulov jarynyń sahnadan qol úze almaitynyn túsinip, onyń shyǵarmashylyq jumysyna qoldaý kórsete bastaǵan.
Mádina 2018 jyly bir jyldyń ishinde 23 án jazyp, ónerge belsendi aralasqanyn NTK tilshilerine aitqan edi. Osylaisha, ánshi turmystyń alǵashqy jyldaryndaǵy shekteýlerden keiin sahnaǵa qaita oralyp, shyǵarmashylyǵyn jalǵastyrdy.
3. Aidana Medenova men Álisher Nurjanov: Kúieýi tyiym saldy degen sóz ras pa?
KeshYOU tobynyń burynǵy ánshisi Aidana Medenova da birneshe jyl sahnadan alystap, kópshilikti túrli boljam jasaýǵa májbúr etti. Ol kásipker ári prodiýser Álisher Nurjanovpen otbasyn qurǵannan keiin de shyǵarmashylyǵyn jalǵastyryp, jańa ánder men beinebaiandar shyǵarǵan.
Alaida keiin ánshi ónerden ketetinin jariialap, úsh jylǵa jýyq mýzykalyq jumystaryna úzilis jasady. Osy aralyqta áleýmettik jelide onyń kúieýi sahnaǵa shyǵýyna tyiym salǵany jáne oramal taǵýǵa májbúrlegeni týraly áńgimeler tarady. Biraq Aidana 2026 jyldyń qańtarynda Gakku TV arnasyna bergen suhbatynda bul boljamdardyń shyndyqqa janaspaitynyn aitty.
Ánshiniń sózinshe, sahnadan ketýine shyǵarmashylyq sharshaý, ómirindegi aýyr oqiǵalar jáne otbasylyq synaqtar sebep bolǵan. Ol ónerden qol úzý týraly sheshim qabyldardan bir jyl buryn ákesinen aiyrylǵanyn jáne sol kezeńniń ózine ońai timegenin jetkizdi. Aidananyń aitýynsha, bul sheshimine kúieýi Álisher Nurjanovtyń ózi de tańǵalǵan.
Keiin "Reviý" baǵdarlamasynda ánshi jarynyń únemi qoldaý kórsetetinin jáne mańyzdy sheshimderdi birge qabyldaitynyn málimdedi. Uzaq úzilisten keiin ónerge qaita oralǵan Aidana óziniń shyǵarmashylyq jolyn jalǵastyratynyn kórsetti.
4. Kámshat Joldybaeva men Ǵazret Qajymuqanuly: "Otbasyly bolǵannan keiin ýaqyt kerek"
KeshYOU toby arqyly tanylǵan Kámshat Joldybaeva jeke shyǵarmashylyǵynda da tanymal ánshi retinde kórermen yqylasyna bólendi. Keiin ol akter Ǵazret Qajymuqanulymen otbasyn quryp, ónerdegi belsendiligin birshama azaitty. Ánshiniń burynǵydai jii kontsertterge shyqpai, kópshilik aldyna sirek kórinýi áleýmettik jelide túrli pikir týǵyzdy. Keibir oqyrmandar Kámshattyń sahnadan alystaýyna kúieýi sebep boldy dep boljady.
Bul másele 2026 jylǵy naýryzda NTK arnasynyń "Reviý" baǵdarlamasynda akter Ǵazret Qajymuqanulyna tikelei qoiyldy.
Suhbat barysynda akter otbasylyq ómirge beiimdelý úshin ýaqyt qajet bolǵanyn aityp, alǵashqy kezeńde jubaiynyń sahnalyq obrazyna qatysty aqyldasqandaryn jasyrmady. Sonymen qatar ol qazir Kámshattyń syrtqy kelbeti men shyǵarmashylyq obrazyna bailanysty sheshimderdi ózi qabyldaitynyn jetkizdi. Ǵazrettiń aitýynsha, olardyń kópshilik aldyna qaita shyǵa bastaǵanyn kórermen de baiqaǵan.
Osylaisha, akter ánshiniń ónerine birjola tyiym salǵany týraly pikirdi rastaǵan joq. Kámshat Joldybaevanyń oqiǵasy tanymal adamnyń otbasyn qurǵannan keiingi shyǵarmashylyq úzilisi jurt arasynda qalai túrli boljamǵa ulasatynyn kórsetedi.
5. Ultý Qabaeva men Ramazan Stamǵaziev: On jyl boiy bala tárbiesine kóńil bólgen ánshi
Qazaqtyń dástúrli án ónerinde ózindik orny bar Ultý Qabaeva da otbasy úshin shyǵarmashylyǵyna uzaq ýaqyt úzilis jasaǵan óner ieleriniń biri. Ol belgili ánshi Ramazan Stamǵazievpen otbasyn quryp, balalarynyń tárbiesine kóbirek kóńil bólgen.
2017 jyly "Qalaýlym" baǵdarlamasyna bergen suhbatynda Ultý Qabaeva on jylǵa jýyq úide otyryp, balalary eseigennen keiin ǵana sahnaǵa qaita shyqqanyn aitty. Sol suhbatta Ramazan Stamǵaziev jas shaǵynda gastroldik saparlarǵa jii shyǵyp, keide úsh-tórt ailap úiine kele almaǵanyn moiyndady. Osyndai kezeńderdiń birinde ol jaryna basqa mamandyq tańdap, balalardyń janynda bolýdy usynǵan.
Alaida Ultý Qabaeva ánshilikten birjola bas tartqysy kelmeitinin aityp, kúieýiniń usynysyna kelispegen. Ramazan Stamǵaziev te sodan keiin jaryna mamandyǵyn aýystyrý týraly qaityp sóz qozǵamaǵanyn jetkizdi. Balalary erjetken soń Ultý Qabaeva bilimin jalǵastyryp, magistratýrany támamdap, shyǵarmashylyǵyna qaita den qoiǵan. Keiin erli-zaiypty birge kontsertter ótkizip, dástúrli án ónerin nasihattaýdy jalǵastyrdy.
Osylaisha, Ultý Qabaeva otbasylyq mindetterge bailanysty sahnadan uzaq ýaqyt alystaǵanymen, súiikti kásibin túbegeili tastaǵan joq.
Óner men otbasynyń arasynda tańdaý jasaý ár ánshiniń ómirinde ártúrli iz qaldyrǵan. Biri jarynyń qalaýymen sahnadan alystasa, endi biri bala tárbiesine kóńil bólip, shyǵarmashylyǵyna ýaqytsha úzilis jasaǵan. Al keibir óner ieleri mundai sheshimdi óz erkimen qabyldaǵanyn aityp, kópshilik arasynda taraǵan qaýesetterdi joqqa shyǵardy. Degenmen olardyń basym bóligi araǵa jyldar salyp, súiikti kásibine qaita oraldy.
Bul oqiǵalar otbasy qurǵannan keiin de shyǵarmashylyq joldy jalǵastyrýǵa bolatynyn, alaida ol úshin erli-zaiyptylardyń ózara túsinistigi men qoldaýy mańyzdy ekenin kórsetedi.
