Aqtóbede kolledj jataqhanasynda bolǵan qaiǵyly oqiǵaǵa bailanysty sot protsesi ótip jatyr. Tergeý materialdaryna sáikes, 21 jastaǵy joǵary kýrs stýdenti 16 jastaǵy Nurbaqyt Baqytty tún ishinde tórtinshi qabattyń terezesinen túsip, dúkenge tamaq ákelýge májbúrlegen. Jasóspirim biiktikten qulap, 42 kúnnen keiin aýrýhanada qaitys bolǵan. Bul týraly Time.kz basylymy jazdy.
Oqiǵa 29 sáýirde Aqtóbe kólik, bailanys jáne jańa tehnologiialar kolledjiniń jataqhanasynda bolǵan.
Tórtinshi qabattan kórpelermen túsirmek bolǵan
Aiyptaý materialdaryna sáikes, qaiǵyly oqiǵa bolǵan túni jataqhananyń bir bólmesinde 16 jastaǵy úsh stýdent telefonmen oiyn oinap otyrǵan. Sol kezde olardyń bólmesine tórtinshi kýrs stýdenti, 21 jastaǵy Madi Súgerbai kirgen. Ol aldymen temeki suraǵan. Jasóspirimderde temeki bolmaǵan soń, bireýin basqa bólmelerden izdeýge jibergen. Alaida ol eshteńe tappai oralǵan.
Odan keiin Súgerbai tamaq ákelýdi talap etken. Bul ýaqytta jataqhanada uiyqtaý ýaqyty bastalyp, qabattardaǵy esikter kiltpen jabylǵan edi.
Sot materialdarynda kórsetilgendei, ol 16 jastaǵy Nurbaqytty tórtinshi qabattaǵy terezeden túsip, dúkenge barýǵa kóndirmek bolǵan. Alǵashynda jasóspirim buǵan qarsylyq bildirgen.
Keiin Súgerbai bes kórpeni bir-birine bailap, arqan retinde paidalanýdy tapsyrǵan. Jasóspirimderdi de osy iske jumyldyrǵan. Bireýi esik aldynda qaraýyldasa, ekinshisi Nurbaqytty túsirýge kómektesken.
Alǵashynda jasóspirim qorqatynyn aityp, terezeden túsýden bas tartqan. Qasyndaǵy kýrstasy ony qaitadan bólmege kirgizgen. Alaida Súgerbai kelip, ony qaitadan syrtqa shyǵýǵa kóndirgen.
Jasóspirim 42 kúnnen keiin kóz jumdy
Nurbaqyt tórtinshi qabattan kórpeler arqyly tómen túsip kele jatqanda, úshinshi jáne tórtinshi qabattyń arasynda qulap ketken. Ony ustap turǵan kórpeler bólmedegi jasóspirimderdiń qolynda qalǵan.
Oqiǵa bolǵan soń stýdentter tárbieshini shaqyryp, politsiia kelgen. Jedel járdem jetkenshe jasóspirimder zardap shekken qurdasyna alǵashqy kómek kórsetýge tyrysqan.
Al aiyptaý materialdarynda Súgerbaidyń áreketi erekshe atap ótiledi. Ol zardap shekken jasóspirimge qatysty «jata bersin, shirip» degen sóz aityp, qalǵan eki stýdentten politsiiaǵa Nurbaqyt terezeden óz erkimen tústi dep aitýdy talap etken.
Aýyr jaraqat alǵan jasóspirim aýrýhanaǵa jetkizilgen. Dárigerler onyń ómirin saqtap qalýǵa tyrysqanymen, Nurbaqyt 42 kúnnen keiin kóz jumǵan.
Qazir Madi Súgerbaiǵa eki bap boiynsha aiyp taǵylǵan. Atap aitqanda, ol adamdy qaýipti jaǵdaida qaldyrdy jáne abaisyzda ólimge sebep boldy dep aiyptalyp otyr. Alaida sottalýshy ózine taǵylǵan aiyptardy moiyndamaidy.
Jataqhanada kishi kýrs stýdentterin uryp-soǵý derekteri de aityldy
Sot otyrysynda kolledj jataqhanasyndaǵy stýdentter arasyndaǵy álimjettik jaǵdailary da belgili bolǵan.
Kishi kýrs stýdentteriniń aitýynsha, joǵary kýrs stýdentteri olardy qorqytyp, uryp-soqqan. Birine aiaq kiim sóresinen alynǵan temir tútikpen soqqy jasalsa, endi birin qanjarmen jáne judyryqpen urǵan. Sondai-aq shapalaqpen urý jaǵdailary bolǵan.
Alaida jasóspirimder bul týraly eshkimge shaǵymdanbaǵan. Olardyń sózinshe, shaǵymdansa, ózgeler olardy «terpila» nemese «satqyn» dep qabyldaýy múmkin edi.
Sotta kýálik bergen stýdentterdiń biri Madi Súgerbaidyń buǵan deiin de basqa stýdentterdi urǵany úshin jataqhanadan shyǵarylǵanyn aitqan. Biraq biraz ýaqyttan keiin ol qaita oralyp, jataqhanada tura bastaǵan.
Osy oqiǵadan keiin kolledj jataqhanasynda stýdentterdi bólek ornalastyrý týraly sheshim qabyldanǵan. Qazir kishi kýrs stýdentteri ekinshi qabatta, al joǵary kýrs stýdentteri úshinshi qabatta turady. Kirý esikteri de bólingen.
Marqumnyń anasy kolledj basshylyǵyn da jaýapqa tartýdy talap etedi
Nurbaqyttyń anasy Kýlaim Qolova qaiǵyly jaǵdaiǵa jataqhana men kolledj basshylyǵy da jaýap berýi kerek dep sanaidy.
«Olardy jaýapqa tartqym keledi. Meniń oiymsha, ol jerde stýdentterdiń qaýipsizdigine kepildik joq, tártip te joq. Ulym ómir úshin kúresip jatqanda, tárbieshilerdiń birinen balalardy nege qadaǵalamaǵanyn suradyq. Ol: “Bizdi sottasa, sottai bersin, biz uiyqtap jatqanbyz”, – dep jaýap berdi. Bul qalai bolǵany? Men balamdy solarǵa senip tapsyrdym», – deidi anasy.
Onyń aitýynsha, kolledj direktory osy ýaqytqa deiin otbasymen kezdesip, kóńil aitpaǵan. Anasynyń sózinshe, basshynyń densaýlyǵyna bailanysty jaǵdaiy bolmaǵany aitylǵan. Al ózge pedagogter otbasyǵa kómektesip, Nurbaqytty sońǵy saparǵa shyǵaryp salýǵa qatysqan.
Sot protsesi jalǵasyp jatyr.
