Tarazda 17 million teńgeden astam aqsha men zergerlik buiymdardy qoldy etti degen kúdikpen eki er adam ustaldy. Kúdiktilerdiń biri urlanǵan altyn shynjyrdy ájethanaǵa aǵyzyp jiberýge árekettengen. Politsiia oqiǵa ornynan túsirilgen beinejazbany jariialady, dep habarlaidy ult.kz.
Jambyl oblystyq politsiia departamentiniń málimetinshe, tártip saqshylaryna jergilikti turǵyn aryzdanǵan. Onyń aitýynsha, úiinen baǵaly tastary bar 30-dan astam zergerlik buiym men 830 myń teńge qolma-qol aqsha joǵalǵan.
Aldyn ala málimet boiynsha, kúdiktiler úi ieleri joq kezde esik qulpyn buzyp, páterge zańsyz kirgen. Urlanǵan múliktiń arasynda altyn áshekeilermen qatar qyrǵyz somy, eýro jáne qytai iýani de bolǵan. Jábirlenýshige keltirilgen jalpy shyǵyn 17 million teńgeden asqan.
Jedel-izdestirý sharalary nátijesinde politsiia eki kúdiktini anyqtap, qolǵa túsirdi. Olardyń biri Túrkistan oblysynyń turǵyny ekeni belgili boldy.
Tintý barysynda kúdiktilerden iske qatysy bar zattai dáleldemeler tabylǵan. Politsiianyń habarlaýynsha, er adamdar qylmys izin jasyrýǵa tyrysyp, urlanǵan múliktiń bir bóliginen qutylmaq bolǵan. Tipti kúdiktilerdiń biri altyn shynjyrdy ájethanaǵa aǵyzyp jiberýge árekettengen. Sonymen qatar urlanǵan áshekeilerdiń keibirin satyp úlgergeni anyqtaldy.
Qazirgi ýaqytta asa iri mólsherdegi urlyq deregi boiynsha sotqa deiingi tergeý júrgizilip jatyr.
