Mańǵystaý oblysynda esirtki kontrabandasymen ainalysqan Iran azamatyna qatysty sot úkimi shyqty. Ol shetelden ushyp kelip, asqazanynda jalpy salmaǵy bir keliden asatyn apiyn salynǵan 113 kapsýlany tasymaldaǵan, dep habarlaidy ult.kz.
Mańǵystaý oblysynyń qylmystyq ister jónindegi mamandandyrylǵan aýdanaralyq soty shetel azamatyn esirtki kontrabandasy, sondai-aq esirtkini ótkizý maqsatynda zańsyz iemdený, saqtaý jáne tasymaldaý baptary boiynsha kináli dep tanydy. Sot sheshimimen oǵan 10 jyl bas bostandyǵynan aiyrý jazasy taǵaiyndaldy.
Sot materialdaryna sáikes, oqiǵa 2026 jyldyń mamyrynda bolǵan. Iran azamaty «Gorgan – Aqtaý» baǵyty boiynsha áýe reisimen Qazaqstanǵa kelgen. Ol jalpy salmaǵy bir keliden asatyn apiyn salynǵan 113 kapsýlany jutyp, asqazanynda tasymaldaǵan. Zańsyz júk Mańǵystaý oblysy boiynsha Ulttyq qaýipsizdik komiteti departamentiniń qyzmetkerleri júrgizgen is-shara barysynda anyqtalyp, tárkilendi.
Memlekettik aiyptaýdy oblys prokýratýrasy qoldady. Sot úkimi zańdy kúshine endi.
Aita keteiik, buǵan deiin Ulttyq qaýipsizdik komiteti Kaspii teńizi akvatoriiasynda halyqaralyq esirtki tasymaldaý arnasynyń jolyn kesken bolatyn.
