Úkimette ótken brifingte Densaýlyq saqtaý ministri Aqmaral Álnazarova Aqtaýda balanyń ákesi dárigerge shabýyl jasaǵan jaǵdaiǵa qatysty túsinikteme berdi. Ministr oqiǵa boiynsha qylmystyq is qozǵalǵanyn jáne eki taraptyń da áreketine quqyqtyq baǵa beriletinin aitty, dep habarlaidy ult.kz.
Brifingte jýrnalister ministrden dárigerge shabýyl jasaǵan adamnyń 12 jylǵa sottalýdan qorqyp, únsiz qalýy múmkin ekenin surady.
«Qyzmetin atqaryp jatqan azamatty bireý kelip, uryp-soǵyp julqylap jatsa, sony ózińiz durys kóresiz be?» – dep jaýap berdi ministr.
Álnazarovanyń aitýynsha, biyl Prezidenttiń tapsyrmasymen meditsina qyzmetkerlerine kúsh qoldanǵany úshin jaýapkershilikti kúsheitetin zań qabyldanyp, sáýir aiynan bastap kúshine engen. Qazirdiń ózinde el boiynsha osyndai faktilerge qatysty 50-ge jýyq qylmystyq is qozǵalǵan.
«Bizdiń negizgi jumysymyz – halyqqa sapaly qyzmet kórsetý. Al bul ata-ananyń bul qylmystyq iske nege barǵany isti tergeý kezinde belgili bolady. Eger tergeý barysynda dárigerdiń kinási anyqtalsa, ony taǵy kórermiz», – dedi ol.
Ministr balanyń ata-anasy da jaýapkershilikten tys qalmaitynyn atap ótti. Onyń sózinshe, olar buǵan deiin eki ret balasyn aýrýhanaǵa jatqyzýdan bas tartyp, qolhat jazyp alyp ketken.
«Eń aldymen bala týraly oilaý kerek. Qylmystyq is qozǵaldy jáne taraptardyń áreketine quqyqtyq baǵa beriledi. Men ata-anany da, dárigerlerdi de aqtaýǵa nemese qaralaýǵa tyrysyp otyrǵan joqpyn. Bári zań aiasynda bolady», – dep sendirdi ministr.
Eske salaiyq, 1 qarashada Aqtaýdaǵy oblystyq balalar aýrýhanasynyń qabyldaý bóliminde er adam dárigerge shabýyl jasap, moinynan qylqyndyrǵan. Aýrýhana ókilderiniń málimetinshe, balalar hirýrgi naýqas balany tekserip, nátijesin ákesine túsindirgen kezde ol kenetten dárigerge tap bergen.
Oqiǵaǵa bailanysty politsiia qylmystyq is qozǵady. Keiin balanyń ákesi ulynan aiyrylyp qalýdan qoryqqanyn aityp, dárigerdiń ózderin mysqylmen qarsy alǵanyn alǵa tartty.
Al oblystyq balalar aýrýhanasynyń qabyldaý bóliminiń hirýrgi Qanat Ismail da ózine taǵylǵan aiyptarǵa qatysty túsinik berdi.
