Roza Rymbaevanyń kelini Aqerke Búrkitbai enesin týǵan kúnimen quttyqtap, júrekjardy tilegin arnady. Ol jazbasynda ánshige zor densaýlyq, uzaq ǵumyr jáne shyǵarmashylyq tabys tiledi, dep habarlaidy ult.kz.
«Mam, týǵan kúnińizben! Denińiz saý, ǵumyryńyz uzaq bolsyn! Árdaiym sahnanyń tórinde jarqyrap, eńbegińizdiń jemisin kórińiz», – dep jazdy Aqerke.
Sondai-aq ol Roza Rymbaevanyń nemeresi Zeiinniń qyzyǵyn kórip, ár jetistigine qýana berýine tilektestik bildirdi.
«Júregińiz tynysh bolyp, aman-esen júz jasańyz! Biz árdaiym janyńyzdamyz», – dep túiindedi kelini.
Aita keteiik, Áli Oqapovtyń úlkenderdiń qolyna sý quiyp júrgen videosy tarady.
Roza Rymbaeva kim?
Roza Qýanyshqyzy Rymbaeva – qazaq estradasynyń kórnekti ánshisi, Qazaqstannyń halyq ártisi, Qazaqstannyń Eńbek Eri. Ol 1957 jylǵy 28 qazanda burynǵy Semei oblysyndaǵy Jańǵyztóbe stantsiiasynda dúniege kelgen. Temirjolshy otbasynda ósken óner iesi jastaiynan án aitýǵa beiim bolǵan. Keiin Almatydaǵy teatr-kórkemsýret institýtynda bilim alyp, ony 1984 jyly támamdaǵan.
Ánshiniń kásibi sahnadaǵy joly «Gúlder» ansamblimen bailanysty. Ol 1976–1979 jyldary osy ujymnyń solisi bolyp, keiin «Arai» ansamblinde óner kórsetken. Bul ansambldiń kórkemdik jetekshisi onyń jubaiy, mýzykant ári dirijer Tasqyn Oqapov edi. Ekeýiniń shyǵarmashylyq bailanysy Roza Rymbaevanyń oryndaýshylyq jolynda mańyzdy oryn aldy.
Roza Rymbaeva 1977 jyly Bolgariiada ótken «Altyn Orfei» halyqaralyq baiqaýynda bas júldeni jeńip alyp, keńinen tanyldy. Sol jyly «Ómirdi ánmen órnektep» búkilodaqtyq televiziialyq baiqaýynda da top jardy. Onyń óner jolyndaǵy tanymal týyndylarynyń biri – kompozitor Seidolla Báiterekovtiń «Áliia» áni. Ánshiniń oryndaýyndaǵy bul shyǵarma qazaqtyń batyr qyzy Áliia Moldaǵulovanyń erligin án arqyly tanytty. 1983 jyly Kýbadaǵy «Gala-83» halyqaralyq baiqaýynda da bas júlde ielendi.
Ónerdegi eńbegi úshin Roza Rymbaeva 1979 jyly Qazaq KSR-iniń eńbek sińirgen ártisi, 1986 jyly halyq ártisi atandy. 2019 jyly oǵan «Qazaqstannyń Eńbek Eri» ataǵy berilip, «Altyn juldyz» airyqsha belgisi men «Otan» ordeni tabystaldy. Ánshilikpen qatar ustazdyqpen de ainalysyp, jas oryndaýshylardyń kásibi qalyptasýyna úles qosty.
Roza Rymbaeva men Tasqyn Oqapovtyń Áli jáne Mádi esimdi eki uly bar. Tasqyn Oqapov 1999 jyly ómirden ótti. Áli 1991 jyly, Mádi 2000 jyly dúniege kelgen.
