Qazaq ónerinde ata-anasynyń izin basyp, sahna men shyǵarmashylyqty tańdaǵandar az emes. Biri ánshilik dástúrdi jalǵastyrsa, endi biri akterlikke nemese dirijerlikke bet burǵan. Ult.kz ónerli otbasynan shyqqan alty tulǵa týraly málimet jinaqtady.
Dimash Qudaibergen
Dimash Qudaibergenniń ákesi Qanat Aitbaev pen anasy Svetlana Aitbaeva – ánshiler. Ónerli otbasynda ósken Dimash ta mýzykaǵa erte aralasyp, keiin halyqaralyq sahnaǵa shyqty. Áke-sheshesi ánshilik joldy tańdasa, uly sol dástúrdi jalǵastyryp, qazaq ánin sheteldik tyńdarmanǵa tanytyp júr.
Áli Oqapov
Áli Oqapov – Qazaqstannyń halyq ártisi Roza Rymbaeva men dirijer Tasqyn Oqapovtyń uly. Ol ánshilikpen qatar prodiýserlikpen de ainalysady. Áli anasynyń jolyn qýyp, estradaǵa kelgenimen, óz repertýaryn qalyptastyryp, jeke oryndaýshy retinde tanyldy.
Mádi Rymbaev
Roza Rymbaeva men Tasqyn Oqapovtyń kenje uly Mádi de ánshilikti tańdaǵan. Ol jeke ánder oryndap, anasy jáne aǵasymen birge sahnaǵa shyǵyp keledi. 2025 jyly Roza Rymbaeva eki ulymen birlesken án men beinebaian usyndy. Osylaisha, bir shańyraqtyń úsh ónerpazy ortaq shyǵarmashylyq jumysta bas qosty.
Aijuldyz Adaibekova
Aijuldyz Adaibekova – ánshi ári aktrisa Janar Aijanovanyń qyzy. Anasy sekildi ol da akterlik ónerge bet buryp, kinoǵa túsip, teatr sahnasynda óner kórsetken. Aijuldyzdyń aitýynsha, anasymen birge bir filmge túsken kezderi de bolǵan. Kórermen ony «Jynym sol» filmindegi rólinen de tanidy.
Dinzýhra Tilendieva
Dinzýhra Tilendieva – áigili kompozitor, kúishi ári dirijer Nurǵisa Tilendievtiń qyzy. Ol ákesiniń jolyn jalǵap, dirijer mamandyǵyn tańdady. Dinzýhra «Otyrar sazy» orkestrimen birge ulttyq mýzykany nasihattap, Nurǵisa Tilendievtiń shyǵarmalaryn oryndap keledi. Ákesiniń 100 jyldyǵyna arnalǵan kontsertterde de orkestrge dirijerlik etti.
Baiǵali Serkebaev
Baiǵali Serkebaev – áigili opera ánshisi Ermek Serkebaevtyń uly. Ákesi opera sahnasynda tanylsa, Baiǵali estradalyq mýzykaǵa bet burdy. Ol – A’Studio tobynyń negizin qalaýshy, kompozitor, klavishshi ári prodiýser. Toptyń kóptegen áni men mýzykalyq óńdeýiniń avtory retinde belgili.
Ákesi Ermek Serkebaev ony klassikalyq mýzykant retinde kórgisi kelgen. Biraq Baiǵali estradany tańdaǵan. WEproject-ke bergen suhbatynda ákesi onyń tańdaýyn A’Studio tobyna 15 jyl tolǵanda ǵana moiyndaǵanyn aitqan. Kontsertine kelip, ulynyń shyǵarmashylyǵyn úlken óner dep baǵalaǵan.
