Тоқаев пен Путин Кремльде кездесіп, стратегиялық серіктестікті жаңа деңгейге көтеру туралы декларацияға қол қойды

Фото: Ақорда

12 қараша күні Мәскеудегі Кремль сарайында Президент Қасым-Жомарт Тоқаевты салтанатты түрде қарсы алу рәсімі өтті, деп хабарлайды Ult.kz.

Мемлекет басшысы Қасым-Жомарт Тоқаев екі ел арасындағы ынтымақтастықтың маңыздылығын атап өтіп:

«Қазақстан мен Ресей – өзара сенімді, уақыт тезінен өткен стратегиялық серіктестер әрі одақтастар. Біздің елдеріміздің тарихи тамыры, өткені мен құндылықтары ортақ. Қос халықтың достығы – тағдырдың жазуы», – деді.

Президенттің айтуынша, барлық деңгейде сенімді диалог орнатудың арқасында Қазақстан мен Ресей арасындағы ынтымақтастық мазмұны үнемі кеңейіп келеді. Сондай-ақ Тоқаев екі ел арасындағы әлемдегі ең ұзын құрлық шекарасы халықтар арасындағы мәңгілік достықтың айғағы екенін атап өтті.

Келіссөздер қорытындысы бойынша Қасым-Жомарт Тоқаев пен Владимир Путин Қазақстан Республикасы мен Ресей Федерациясының мемлекетаралық қатынасын жан-жақты стратегиялық серіктестік және одақтастық деңгейіне дейін жеткізу жөніндегі декларацияға қол қойды.

Мемлекеттер басшыларының қатысуымен бірқатар маңызды құжаттармен алмасу рәсімі өтті. Олардың қатарында:

1. 2026–2030 жылдарға арналған экономикалық ынтымақтастықтың кешенді бағдарламасы;

2. Үшінші елдерге экспортқа арналған жүктерді темір жолмен транзиттік тасымалдау туралы келісім;

3. Көлік қауіпсіздігін қамтамасыз ету саласындағы ынтымақтастық туралы келісім;

4. «Союз-5» және «Бәйтерек» ғарыш зымыран кешендерінің ұшу сынағын жүргізу жөніндегі комиссия құру туралы келісім;

5. Ақтау қаласында Ресей Федерациясының Бас консульдығын ашу туралы келісім;

6. Санитарлық-эпидемиологиялық қауіпсіздік саласындағы ынтымақтастық туралы келісім;

7. Ерекше экономикалық аймақтарды дамыту жөніндегі меморандум;

8. Қазақстан мен Ресейде қазақ-орыс және орыс-қазақ мектептерін ашу туралы ниеттестік туралы меморандум;

9. Ресейден Қазақстанға Амур жолбарыстарын әкелу жөніндегі бірлескен іс-шаралар жоспары;

10. Атом энергиясын бейбіт мақсатта пайдалану кезінде ядролық және радиациялық қауіпсіздікті реттеу саласындағы ынтымақтастық туралы меморандум;

11. Қазақстан-Ресей шекарасындағы автокөлік өткізу бекеттерін дамыту жөніндегі іс-шаралар жоспары;

12. «ҚТЖ» мен «РТЖ» арасындағы 2030 жылға дейінгі мемлекетаралық түйісу пункттерін дамыту туралы келісім;

13. «Қазпошта» мен «Ресей поштасы» арасындағы ынтымақтастық туралы меморандум.

Мемлекет басшылары екі елдің өзара ынтымақтастығын одан әрі нығайтуға және ортақ мақсаттарға бірлесе жетуге сенім білдірді.