Toqaev pen Pýtin Kremlde kezdesip, strategiialyq seriktestikti jańa deńgeige kóterý týraly deklaratsiiaǵa qol qoidy

Foto: Aqorda

12 qarasha kúni Máskeýdegi Kreml saraiynda Prezident Qasym-Jomart Toqaevty saltanatty túrde qarsy alý rásimi ótti, dep habarlaidy Ult.kz.

Memleket basshysy Qasym-Jomart Toqaev eki el arasyndaǵy yntymaqtastyqtyń mańyzdylyǵyn atap ótip:

«Qazaqstan men Resei – ózara senimdi, ýaqyt tezinen ótken strategiialyq seriktester ári odaqtastar. Bizdiń elderimizdiń tarihi tamyry, ótkeni men qundylyqtary ortaq. Qos halyqtyń dostyǵy – taǵdyrdyń jazýy», – dedi.

Prezidenttiń aitýynsha, barlyq deńgeide senimdi dialog ornatýdyń arqasynda Qazaqstan men Resei arasyndaǵy yntymaqtastyq mazmuny únemi keńeiip keledi. Sondai-aq Toqaev eki el arasyndaǵy álemdegi eń uzyn qurlyq shekarasy halyqtar arasyndaǵy máńgilik dostyqtyń aiǵaǵy ekenin atap ótti.

Kelissózder qorytyndysy boiynsha Qasym-Jomart Toqaev pen Vladimir Pýtin Qazaqstan Respýblikasy men Resei Federatsiiasynyń memleketaralyq qatynasyn jan-jaqty strategiialyq seriktestik jáne odaqtastyq deńgeiine deiin jetkizý jónindegi deklaratsiiaǵa qol qoidy.

Memleketter basshylarynyń qatysýymen birqatar mańyzdy qujattarmen almasý rásimi ótti. Olardyń qatarynda:

1. 2026–2030 jyldarǵa arnalǵan ekonomikalyq yntymaqtastyqtyń keshendi baǵdarlamasy;

2. Úshinshi elderge eksportqa arnalǵan júkterdi temir jolmen tranzittik tasymaldaý týraly kelisim;

3. Kólik qaýipsizdigin qamtamasyz etý salasyndaǵy yntymaqtastyq týraly kelisim;

4. «Soiýz-5» jáne «Báiterek» ǵarysh zymyran keshenderiniń ushý synaǵyn júrgizý jónindegi komissiia qurý týraly kelisim;

5. Aqtaý qalasynda Resei Federatsiiasynyń Bas konsýldyǵyn ashý týraly kelisim;

6. Sanitarlyq-epidemiologiialyq qaýipsizdik salasyndaǵy yntymaqtastyq týraly kelisim;

7. Erekshe ekonomikalyq aimaqtardy damytý jónindegi memorandým;

8. Qazaqstan men Reseide qazaq-orys jáne orys-qazaq mektepterin ashý týraly niettestik týraly memorandým;

9. Reseiden Qazaqstanǵa Amýr jolbarystaryn ákelý jónindegi birlesken is-sharalar jospary;

10. Atom energiiasyn beibit maqsatta paidalaný kezinde iadrolyq jáne radiatsiialyq qaýipsizdikti retteý salasyndaǵy yntymaqtastyq týraly memorandým;

11. Qazaqstan-Resei shekarasyndaǵy avtokólik ótkizý beketterin damytý jónindegi is-sharalar jospary;

12. «QTJ» men «RTJ» arasyndaǵy 2030 jylǵa deiingi memleketaralyq túiisý pýnktterin damytý týraly kelisim;

13. «Qazposhta» men «Resei poshtasy» arasyndaǵy yntymaqtastyq týraly memorandým.

Memleket basshylary eki eldiń ózara yntymaqtastyǵyn odan ári nyǵaitýǵa jáne ortaq maqsattarǵa birlese jetýge senim bildirdi.